Көкшетауда 23 жастағы тұрғын психотропты дәрі-дәрмектерді заңсыз сатқаны үшін 7 жылға бас бостандығынан айырылды, деп хабарлайды ult.kz.
Сот мәліметінше, бойжеткен 2024 жылдың күзінен бастап интернет арқылы дәрі-дәрмектерді ірі көлемде сатып алып, таныстарына сатқан. Бұл препараттар тәуелділік тудыруы мүмкін және оларды тек дәрігер рецептімен алуға рұқсат етіледі.
Полицейлер оның үйін тінту кезінде дәрі-дәрмектерді және оларды сату туралы әлеуетті сатып алушылармен хат-хабарларды тәркілеген.
Сотта куәгерлер оның заңсыз саудамен айналысқанын растады. Бұған дейін электронды темекі сатқан бойжеткен кейін психотропты препараттарды өткізуге көшкен.
Сот оны кінәлі деп танып, орташа қауіпсіздік мекемесінде 7 жыл жазасын өтеуге үкім шығарды. Сонымен қатар, оған медициналық сипаттағы мәжбүрлеу шарасы тағайындалды.
