"Жігіттер" тобының әншісі Ердос Қанаев әлемге танымал әнші Димаш Құдайбергенмен ортақ ерекшелігін айтып, әлеуметтік желіде әзілге толы жазба жариялады, деп хабарлайды ult.kz.
Өнер иесі Instagram парақшасында Димаш Құдайбергеннің суретін бөлісіп, екеуін байланыстыратын бір нәрсе бар екенін жазған. Алайда көпшіліктің назарын аударған бұл ұқсастықтың сыры мүлде басқа болып шықты.
"Бүгін байқадым. Димаштай екеумізді байланыстыратын бір дүние бар", – деп жазды әнші.
Кейін Ердос Қанаев бұл сөзінің мәнін түсіндіріп, жұртты күлдірді.
"Әлі күнге дейін айфон 13, 14, 15, 16, 17, 18 ұстамаған екеуміз ғана қалдық па деп қалдым", – деп әзілдеді өнер иесі.
Әншінің бұл жазбасы желі қолданушыларының қызығушылығын тудырып, пікір алаңында әзілге ұласты. Оқырмандардың бір бөлігі өздерінің де соңғы үлгідегі iPhone пайдаланбайтынын айтып, қалжыңға қосылған.
Желіде "Мүлдем айфон ұстамағандар, жиналыңдар!" деген сарындағы әзілдер де жазылды. Кейбір қолданушылар әншінің жазбасынан өздерін танығандай болып, заманауи смартфондардың соңғы үлгілерін сатып алуға асықпайтындарын әзілмен жеткізді. Осылайша, Ердос Қанаевтың Димаш Құдайбергенмен ортақ қасиеті туралы жазбасы көпшілікке көтеріңкі көңіл күй сыйлап, әлеуметтік желіде қызу талқыланды.
Айта кетейік, Ердос Қанаев бұған дейін де әлеуметтік желіде әзіл аралас жазбаларымен оқырмандарын күлдірген. Жақында ол үйленуге ең қолайлы жас 80 жас екенін айтып, ерлі-зайыптылар арасындағы түсіністік туралы қалжыңымен көпшіліктің назарын аударған еді.
Димаш Құдайберген кім?
Димаш Құдайберген – ерекше дауысымен әлемге танылған қазақстандық әнші, композитор және мультиаспапшы. Ол 1994 жылы 24 мамырда Ақтөбе қаласында дүниеге келген. Өнерлі отбасында тәрбиеленген Димаш бала кезінен музыкаға қызығып, кәсіби білім алған. 2015 жылы Беларусьтің Витебск қаласында өткен "Славян базары" халықаралық байқауында бас жүлдені жеңіп алды. 2017 жылы Қытайдағы Singer музыкалық жобасына қатысып, екінші орын иеленді. Осы байқаудан кейін оның танымалдығы артып, әлемнің түрлі елдерінде жанкүйерлері көбейді. Димаш кең дауыс диапазонымен және классикалық, эстрадалық әрі ұлттық музыканы үйлестіре орындауымен ерекшеленеді. Оның репертуарында қазақ, ағылшын, француз, қытай және басқа да тілдердегі шығармалар бар. Әнші халықаралық сахналарда жеке концерттер өткізіп, қазақ музыкасын шетелдік тыңдармандарға таныстырып жүр. Ол шығармашылығында ұлттық мәдениетке ерекше мән беріп, Қазақстанның өнерін әлемге насихаттауға үлес қосып келеді.
Ердос Қанаев кім?
Ердос Қанаев – қазақстандық әнші, көпшілікке "Жігіттер" тобының мүшесі ретінде танылған өнер иесі. Ол қазақ эстрадасында топ құрамындағы шығармашылығымен белгілі болды. "Жігіттер" тобы лирикалық әндерімен және сахналық өнерімен тыңдарман ықыласына бөленген. Ердос Қанаев топтағы әріптестерімен бірге түрлі концерттер мен музыкалық жобаларға қатысып келеді. Әнші әлеуметтік желілерде де белсенділік танытып, оқырмандарымен күнделікті өмірі мен шығармашылығына қатысты жазбалар бөліседі.
Ол Түркістан облысының Ордабасы ауданына қарасты Шұбар ауылында дүниеге келген. Жоғары оқу орнында қазақ тілі мен әдебиеті пәнінің мұғалімі мамандығы бойынша білім алған. Ердос өнер жолын 2003 жылы құрылған "Жігіттер" квартетімен байланыстырды. Сол жылы топ "Арай" республикалық байқауында бас жүлдені жеңіп алды. Кейін "Ерке қыз" әні арқылы көпшілікке кеңінен танылды. 2006 жылы квартет Алматыда алғашқы жеке концертін өткізді. Ердос Қанаев топ құрамында өнер көрсетумен қатар, жеке музыкалық жобаларға да қатысқан. Ол сұхбаттарында шығармашылығы, сахнадағы өмірі және өнердегі жоспарлары туралы айтып жүр.
