"Jigitter" tobynyń ánshisi Erdos Qanaev álemge tanymal ánshi Dimash Qudaibergenmen ortaq ereksheligin aityp, áleýmettik jelide ázilge toly jazba jariialady, dep habarlaidy ult.kz.
Óner iesi Instagram paraqshasynda Dimash Qudaibergenniń sýretin bólisip, ekeýin bailanystyratyn bir nárse bar ekenin jazǵan. Alaida kópshiliktiń nazaryn aýdarǵan bul uqsastyqtyń syry múlde basqa bolyp shyqty.
"Búgin baiqadym. Dimashtai ekeýmizdi bailanystyratyn bir dúnie bar", – dep jazdy ánshi.
Keiin Erdos Qanaev bul sóziniń mánin túsindirip, jurtty kúldirdi.
"Áli kúnge deiin aifon 13, 14, 15, 16, 17, 18 ustamaǵan ekeýmiz ǵana qaldyq pa dep qaldym", – dep ázildedi óner iesi.
Ánshiniń bul jazbasy jeli qoldanýshylarynyń qyzyǵýshylyǵyn týdyryp, pikir alańynda ázilge ulasty. Oqyrmandardyń bir bóligi ózderiniń de sońǵy úlgidegi iPhone paidalanbaitynyn aityp, qaljyńǵa qosylǵan.
Jelide "Múldem aifon ustamaǵandar, jinalyńdar!" degen saryndaǵy ázilder de jazyldy. Keibir qoldanýshylar ánshiniń jazbasynan ózderin tanyǵandai bolyp, zamanaýi smartfondardyń sońǵy úlgilerin satyp alýǵa asyqpaityndaryn ázilmen jetkizdi. Osylaisha, Erdos Qanaevtyń Dimash Qudaibergenmen ortaq qasieti týraly jazbasy kópshilikke kóterińki kóńil kúi syilap, áleýmettik jelide qyzý talqylandy.
Aita keteiik, Erdos Qanaev buǵan deiin de áleýmettik jelide ázil aralas jazbalarymen oqyrmandaryn kúldirgen. Jaqynda ol úilenýge eń qolaily jas 80 jas ekenin aityp, erli-zaiyptylar arasyndaǵy túsinistik týraly qaljyńymen kópshiliktiń nazaryn aýdarǵan edi.
Dimash Qudaibergen kim?
Dimash Qudaibergen – erekshe daýysymen álemge tanylǵan qazaqstandyq ánshi, kompozitor jáne mýltiaspapshy. Ol 1994 jyly 24 mamyrda Aqtóbe qalasynda dúniege kelgen. Ónerli otbasynda tárbielengen Dimash bala kezinen mýzykaǵa qyzyǵyp, kásibi bilim alǵan. 2015 jyly Belarýstiń Vitebsk qalasynda ótken "Slavian bazary" halyqaralyq baiqaýynda bas júldeni jeńip aldy. 2017 jyly Qytaidaǵy Singer mýzykalyq jobasyna qatysyp, ekinshi oryn ielendi. Osy baiqaýdan keiin onyń tanymaldyǵy artyp, álemniń túrli elderinde jankúierleri kóbeidi. Dimash keń daýys diapazonymen jáne klassikalyq, estradalyq ári ulttyq mýzykany úilestire oryndaýymen erekshelenedi. Onyń repertýarynda qazaq, aǵylshyn, frantsýz, qytai jáne basqa da tilderdegi shyǵarmalar bar. Ánshi halyqaralyq sahnalarda jeke kontsertter ótkizip, qazaq mýzykasyn sheteldik tyńdarmandarǵa tanystyryp júr. Ol shyǵarmashylyǵynda ulttyq mádenietke erekshe mán berip, Qazaqstannyń ónerin álemge nasihattaýǵa úles qosyp keledi.
Erdos Qanaev kim?
Erdos Qanaev – qazaqstandyq ánshi, kópshilikke "Jigitter" tobynyń múshesi retinde tanylǵan óner iesi. Ol qazaq estradasynda top quramyndaǵy shyǵarmashylyǵymen belgili boldy. "Jigitter" toby lirikalyq ánderimen jáne sahnalyq ónerimen tyńdarman yqylasyna bólengen. Erdos Qanaev toptaǵy áriptesterimen birge túrli kontsertter men mýzykalyq jobalarǵa qatysyp keledi. Ánshi áleýmettik jelilerde de belsendilik tanytyp, oqyrmandarymen kúndelikti ómiri men shyǵarmashylyǵyna qatysty jazbalar bólisedi.
Ol Túrkistan oblysynyń Ordabasy aýdanyna qarasty Shubar aýylynda dúniege kelgen. Joǵary oqý ornynda qazaq tili men ádebieti pániniń muǵalimi mamandyǵy boiynsha bilim alǵan. Erdos óner jolyn 2003 jyly qurylǵan "Jigitter" kvartetimen bailanystyrdy. Sol jyly top "Arai" respýblikalyq baiqaýynda bas júldeni jeńip aldy. Keiin "Erke qyz" áni arqyly kópshilikke keńinen tanyldy. 2006 jyly kvartet Almatyda alǵashqy jeke kontsertin ótkizdi. Erdos Qanaev top quramynda óner kórsetýmen qatar, jeke mýzykalyq jobalarǵa da qatysqan. Ol suhbattarynda shyǵarmashylyǵy, sahnadaǵy ómiri jáne ónerdegi josparlary týraly aityp júr.
