Қазақстандық студенттердің шетелде қиын жағдайға тап болуы және туристік компанияларға қатысты алаяқтық фактілері депутаттық сауалға арқау болды. Құрылтай депутаты, «Әділет» партиясы фракциясының мүшесі Константин Петров туризм және жастар алмасу бағдарламаларын ұйымдастыру саласындағы бақылауды күшейтуді ұсынды, деп хабарлайды ult.kz.
Депутаттық сауал Туризм және спорт министрі Ербол Мырзабосынов пен Ғылым және жоғары білім министрі Саясат Нұрбекке жолданды.
Сауалда жақында АҚШ-қа Work and Travel бағдарламасы аясында барған шамамен 200 қазақстандық студенттің қиындыққа тап болғаны айтылған. Жастар үш ай жұмыс істегеннен кейін ел ішінде саяхаттау үшін ұйымдастырылған турға қатысқан. Алайда сапардың бесінші күнінде тур тоқтатылып, студенттердің бір бөлігі Лос-Анджелесте қонақүйсіз және көліксіз қалғанын хабарлаған. Әр студент тур үшін шамамен 1100 доллар төлеген. Қазақстанның Сыртқы істер министрлігі ұйымдастырушылармен байланысқа шығып, жағдайды бақылауға алғанын мәлімдеген.
«Бұл жағдай туристік қызмет пен жастар алмасу бағдарламаларын ұйымдастыру саласында азаматтардың құқықтарын қорғау тетіктерін күшейту қажеттігін көрсетті», – деп атап өтті депутат.
Сондай-ақ сауалда Ақтөбедегі туристік компанияға қатысты қылмыстық іс қозғалғаны мысал ретінде келтірілген. Құқық қорғау органдарының мәліметінше, компания басшысы шетелге туристік сапарлар ұйымдастыру сылтауымен азаматтардан ақша алған, алайда міндеттемелерін орындамаған. Іс бойынша 70-тен астам адам жәбірленуші ретінде тіркеліп, келтірілген материалдық шығын 32 млн теңгеден асқан.
Константин Петров халықаралық тәжірибені де ескеруді ұсынды. Оның айтуынша, АҚШ-та жастар алмасу бағдарламалары, соның ішінде Summer Work Travel, федералдық деңгейде BridgeUSA жүйесі арқылы реттеледі. Ал Еуропалық одақта пакет турлар мен байланысты туристік қызметтерге қатысты талаптар ұйымдастырушылардың жауапкершілігін және тұтынушыларды қорғау кепілдіктерін қарастырады.
Депутат Қазақстанда жастарды шетелге тағылымдамалар мен алмасу бағдарламаларына жіберетін делдалдардың қызметін бақылауды күшейту қажет деп санайды.
Осыған байланысты ол үш негізгі шараны ұсынды:
Біріншіден, шетелдік тағылымдамалар мен жастар алмасу бағдарламаларын ұйымдастыратын туристік және білім беру агенттіктеріне мемлекеттік аккредиттеу талабын енгізу ұсынылды. Сондай-ақ олар шетелдегі ресми мойындалған қабылдаушы ұйымдармен тікелей келісімшарт жасасуы тиіс.
Екіншіден, азаматтар келісімшартқа отырмас бұрын компанияның заңдылығын тексере алуы үшін аккредиттелген операторлардың бірыңғай ашық тізімін қалыптастыру ұсынылды.
Үшіншіден, халықаралық сапарларды ұйымдастырушыларға компания банкротқа ұшыраған немесе алаяқтық әрекеттер орын алған жағдайда азаматтарды шұғыл елге қайтару шығындарын жабатын резервтік қор немесе сақтандыру өнімдерін қалыптастыру міндетін енгізу ұсынылды.
Депутат бұл шаралар азаматтардың құқықтарын қорғауға, туристік қызмет нарығындағы жауапкершілікті арттыруға және жастардың шетелдік бағдарламаларға қатысу қауіпсіздігін күшейтуге бағытталғанын атап өтті.
