Qazaqstandyq stýdentterdiń shetelde qiyn jaǵdaiǵa tap bolýy jáne týristik kompaniialarǵa qatysty alaiaqtyq faktileri depýtattyq saýalǵa arqaý boldy. Quryltai depýtaty, «Ádilet» partiiasy fraktsiiasynyń múshesi Konstantin Petrov týrizm jáne jastar almasý baǵdarlamalaryn uiymdastyrý salasyndaǵy baqylaýdy kúsheitýdi usyndy, dep habarlaidy ult.kz.
Depýtattyq saýal Týrizm jáne sport ministri Erbol Myrzabosynov pen Ǵylym jáne joǵary bilim ministri Saiasat Nurbekke joldandy.
Saýalda jaqynda AQSh-qa Work and Travel baǵdarlamasy aiasynda barǵan shamamen 200 qazaqstandyq stýdenttiń qiyndyqqa tap bolǵany aitylǵan. Jastar úsh ai jumys istegennen keiin el ishinde saiahattaý úshin uiymdastyrylǵan týrǵa qatysqan. Alaida sapardyń besinshi kúninde týr toqtatylyp, stýdentterdiń bir bóligi Los-Andjeleste qonaqúisiz jáne kóliksiz qalǵanyn habarlaǵan. Ár stýdent týr úshin shamamen 1100 dollar tólegen. Qazaqstannyń Syrtqy ister ministrligi uiymdastyrýshylarmen bailanysqa shyǵyp, jaǵdaidy baqylaýǵa alǵanyn málimdegen.
«Bul jaǵdai týristik qyzmet pen jastar almasý baǵdarlamalaryn uiymdastyrý salasynda azamattardyń quqyqtaryn qorǵaý tetikterin kúsheitý qajettigin kórsetti», – dep atap ótti depýtat.
Sondai-aq saýalda Aqtóbedegi týristik kompaniiaǵa qatysty qylmystyq is qozǵalǵany mysal retinde keltirilgen. Quqyq qorǵaý organdarynyń málimetinshe, kompaniia basshysy shetelge týristik saparlar uiymdastyrý syltaýymen azamattardan aqsha alǵan, alaida mindettemelerin oryndamaǵan. Is boiynsha 70-ten astam adam jábirlenýshi retinde tirkelip, keltirilgen materialdyq shyǵyn 32 mln teńgeden asqan.
Konstantin Petrov halyqaralyq tájiribeni de eskerýdi usyndy. Onyń aitýynsha, AQSh-ta jastar almasý baǵdarlamalary, sonyń ishinde Summer Work Travel, federaldyq deńgeide BridgeUSA júiesi arqyly retteledi. Al Eýropalyq odaqta paket týrlar men bailanysty týristik qyzmetterge qatysty talaptar uiymdastyrýshylardyń jaýapkershiligin jáne tutynýshylardy qorǵaý kepildikterin qarastyrady.
Depýtat Qazaqstanda jastardy shetelge taǵylymdamalar men almasý baǵdarlamalaryna jiberetin deldaldardyń qyzmetin baqylaýdy kúsheitý qajet dep sanaidy.
Osyǵan bailanysty ol úsh negizgi sharany usyndy:
Birinshiden, sheteldik taǵylymdamalar men jastar almasý baǵdarlamalaryn uiymdastyratyn týristik jáne bilim berý agenttikterine memlekettik akkreditteý talabyn engizý usynyldy. Sondai-aq olar sheteldegi resmi moiyndalǵan qabyldaýshy uiymdarmen tikelei kelisimshart jasasýy tiis.
Ekinshiden, azamattar kelisimshartqa otyrmas buryn kompaniianyń zańdylyǵyn teksere alýy úshin akkredittelgen operatorlardyń biryńǵai ashyq tizimin qalyptastyrý usynyldy.
Úshinshiden, halyqaralyq saparlardy uiymdastyrýshylarǵa kompaniia bankrotqa ushyraǵan nemese alaiaqtyq áreketter oryn alǵan jaǵdaida azamattardy shuǵyl elge qaitarý shyǵyndaryn jabatyn rezervtik qor nemese saqtandyrý ónimderin qalyptastyrý mindetin engizý usynyldy.
Depýtat bul sharalar azamattardyń quqyqtaryn qorǵaýǵa, týristik qyzmet naryǵyndaǵy jaýapkershilikti arttyrýǵa jáne jastardyń sheteldik baǵdarlamalarǵa qatysý qaýipsizdigin kúsheitýge baǵyttalǵanyn atap ótti.
