Sanjar Boqaevtyń isi boiynsha Almaly aýdandyq sotynda ótken kezekti otyrysta prokýror úsh negizgi kýáger – Nursultan Razdy, Aqylbek Hamrakýlovty jáne Artyqbaevty sotqa májbúrli túrde jetkizý týraly ótinishhat berdi. Olardyń ekeýi sot shaqyrtýyn elemei, óz erkimen kelýden bas tartyp júr. Al Artyqbaev qazirgi ýaqytta basqa qylmystyq quqyq buzýshylyq jasaǵany úshin qamaýda otyr, dep habarlaidy ult.kz.
Boqaevtyń advokattary bul ótinishhatqa qarsylyq bildirip, kýágerlerdi májbúrli túrde jetkizýge qarsy shyqty. Alaida tóraǵalyp etip jatqan sýdia atalǵan adamdardyń sot otyrysyna mindetti túrde qatysýyn qamtamasyz etý týraly qaýly shyǵardy.
Qorǵaý tarapynyń bul kýágerlerdi sotta kórgisi kelmeýiniń sebebi buǵan deiingi otyrystarda jariialanǵan materialdarǵa bailanysty bolýy múmkin. Eske sala keteiik, Baým toǵaiyndaǵy instsenirovka epizody boiynsha aǵashtardy tikelei kesken adamdar – Raz, Hamrakýlov jáne Artyqbaev.
Buǵan deiin Boqaevtyń jeke beineoperatory Ulan Núsipqoja men politsiianyń jedel qyzmetkerleri sotta tikelei jaýap bergen bolatyn. Olardyń aitýynsha, Boqaev kóliginiń terezesi arqyly Hamrakýlovqa bir býma qolma-qol aqsha bergennen keiin aǵashtar ádeii kesilgen. Qolyna aqsha túsken soń ǵana jaldanǵan jumysshylar lombardtan benzinmen jumys isteitin arany satyp alyp, ormanǵa attanǵan.
Kezekti sot otyrysy nazar aýdarýǵa laiyqty protsessýaldyq jaǵdaimen aiaqtaldy. Boqaevtyń advokattary qatarynan bes sot otyrysynda is materialdarymen tanysý úshin qosymsha ýaqyt berýdi turaqty túrde surap keledi. Qorǵaý tarapynyń ótinishin eskergen sýdia bul joly sot otyrysyn josparlanǵan ýaqyttan bir saǵat buryn aiaqtady.
Sot hatshysy qorǵaýshylar suratqan qujattardy sol jerde, iaǵni sot zalynda tanysý úshin tez arada berýge daiyn bolǵan. Alaida aiyptalýshylardy tergeý izoliatoryna alyp ketken boida advokattar ǵimarattan asyǵys shyǵyp ketken. Olar tipti memlekettik aiyptaý tarapynyń ókilderinen buryn sot ǵimaratynan ketip, buǵan deiin ózderi birneshe ret ótinish bildirgen is materialdaryn múlde qaramaǵan.
