Prokýratýra ókilderiniń aitýynsha, habarlamalardyń memlekettik tilde jazylýy azamattardyń olarǵa degen senimin arttyrady, dep habarlaidy ult.kz.
Qazaqstanda 9 qarashadan bastap sálemdemelerdi jetkizý týraly jalǵan habarlamalar jappai tarala bastaǵan. Alaiaqtar ózderin «Qazposhta» qyzmetkerleri retinde tanystyrady. Habarlamalar kóbine sheteldik +212 6 12 82 15 27 nómirinen jiberiledi.
«Alýshylarǵa sálemdeme jetkiziletini týraly jalǵan aqparat beriledi. Mekenjaidy naqtylaý qajet degen jeleýmen qosa tirkelgen siltemege ótip, jetispeitin málimetterdi óz betinshe toltyrý usynylady», – dep habarlady prokýratýra.
Habarlamany resmi etip kórsetý úshin alaiaqtar siltemege qalai ótý jáne jetkizý mekenjaiyn qalai naqtylaý kerektigi jóninde nusqaýlyq ta qosady. Alaida silteme poshta qyzmetiniń resmi saityna uqsatyp jasalǵan jalǵan paraqshaǵa aparady. Ondaǵy arnaiy forma arqyly alaiaqtar azamattardyń turǵylyqty mekenjaiy men basqa da jeke derekterin jinaidy.
«Alaiaqtyq habarlamalardyń memlekettik tilde jiberilýi erekshe qaýip tóndiredi. Sebebi bul alýshylardyń senimin arttyryp, saqtyq sharalaryn tómendetedi. Habarlamalar resmi-iskerlik stilde, poshta qyzmetiniń habarlamalaryna tán sóz tirkesteri men belgilerdi paidalana otyryp ázirlengen», – dep eskertti qadaǵalaý organy.
Bas prokýratýra qazaqstandyqtarǵa sálemdemeniń mártebesin tek poshta qyzmetiniń resmi arnalary arqyly tekserýge keńes beredi. Sondai-aq kúmándi habarlamalardaǵy siltemeler arqyly jeke nemese bank derekterin engizbeýge shaqyrady.
