Abai oblysynda Semei qalasynyń joǵalyp ketken turǵynyn izdeý jumystary aiaqtaldy. Bul týraly oblystyq politsiia departamentiniń baspasóz qyzmeti habarlady, dep jazady ult.kz.
Ólimniń aldyn ala sebebi - úsip qalý bolýy múmkin.
1982 jyly týǵan Rinat Ahmetov sońǵy ret 6 qarasha kúni tańǵy saǵat 5:00 shamasynda bailanysqa shyqqan. Sodan keiin onyń qaida ekeni belgisiz bolyp qalǵan.
Joǵalǵan azamattyń kóligi birneshe kúnnen keiin, 9 qarashada, Ertis ózenine jaqyn mańdaǵy Piatiletka, Novovasilevka jáne Alekseevka eldi mekenderi aýmaǵynan tabylǵan.
«Er adamnyń denesi Borodýliha aýdanyna qarasty Novovasilevka aýylynan shamamen 35 shaqyrym jerdegi ashyq dalada tabyldy. Aldyn ala málimet boiynsha, ólimge úsip qalý sebep bolýy múmkin», - delingen politsiia habarlamasynda.
Ólimniń naqty sebebin anyqtaý úshin sot-meditsinalyq saraptama taǵaiyndalady.
Izdestirý jumystaryna 60-tan astam politsiia qyzmetkeri, onyń ishinde arnaiy jedel áreket etý jasaǵynyń (SOBR) 30 qyzmetkeri, 10 qutqarýshy, 50 áskeri qyzmetshi, tórt erikti jáne joǵalǵan azamattyń 10 týysy men dosy qatysqan.
Sondai-aq jergilikti turǵyndar qoldaý kórsetip, jetýi qiyn aýmaqtardy tekserý úshin 12 traktor bólgen. Quqyq qorǵaý organdary izdeý barysynda eki kvadrotsikl paidalanǵan.
Politsiia departamenti marqumnyń týǵan-týystary men jaqyndaryna kóńil aitty.
Esterińizge sala keteiik, buǵan deiin qaza tapqan azamattyń kóligi jyradan tabylǵandyǵyn habarlaǵan edik.
