Pavlodar qalasynyń politsiiasy josparlanyp jatqan lańkestik áreket týraly jalǵan habarlama bergen jasóspirimge qatysty qylmystyq is qozǵady, dep habarlaidy ult.kz.
Politsiianyń málimetinshe, oqýshy sabaqqa keshigip kelip, sport zalynda qaraýsyz qalǵan synyptasynyń telefonyn baiqaidy. Sodan keiin sol telefon arqyly jedel qyzmet nómirine qońyraý shalyp, lańkestik áreket týraly habarlaǵan.
Jasóspirim óz qońyraýynyń arty qandai jaǵdaiǵa ákeletinin oilamaǵanyn túsindirgen.
«Lańkestik akt týraly kórineý jalǵan habarlaý deregi boiynsha qylmystyq is qozǵaldy. Kámeletke tolmaǵan jasóspirim zańdy ókilderiniń kepildigimen tapsyryldy», – dedi Pavlodar qalalyq politsiia basqarmasynyń bastyǵy Balǵabai Qaparov.
Politsiia ókilderi lańkestik áreket týraly jalǵan aqparat habarlaý qylmystyq quqyq buzýshylyq bolyp sanalatynyn eske saldy. Mundai áreket úshin bes jylǵa deiin bas bostandyǵynan aiyrý jazasy qarastyrylǵan.
Sonymen qatar jalǵan habarlamaǵa bailanysty jedel qyzmetter jumsaǵan shyǵyndy jasóspirimniń ata-anasy óteýge mindetti bolady.
