Túrkistan oblysynda «Zań men tártip» qaǵidaty aiasynda «Esirtkisiz bolashaq» atty nashaqorlyqqa qarsy forým ótti. Aýqymdy is-shara oblys kóleminde uiymdastyrylǵan onkúndik profilaktikalyq jumystarynyń qorytyndysyna arnaldy.
Forýmǵa Túrkistan oblysynyń ákimi Nuralhan Kósherov, Politsiia departamentiniń bastyǵy Arystanǵani Zapparov, Ulttyq qaýipsizdik komiteti Túrkistan oblysy boiynsha departamentiniń basshysy Bolat Qalmurzaev, QR IIM Esirtki qylmysyna qarsy is-qimyl komitetiniń tóraǵasy Abai Júsipov, QR Quryltaiynyń depýtaty Gúlishan Nahbaeva, Qazaqstan Halyq Keńesiniń múshesi, «Qazaqstan Team» respýblikalyq qoǵamdyq jastar birlestiginiń jetekshisi Oljas Súleimen, «Jaidarman» jobasynyń jetekshisi, «Qurmet» ordeniniń iegeri Esen Eleýken, sondai-aq prokýratýra, sot, politsiia jáne ózge de quzyrly organdardyń ókilderi men jastar qatysty.
Forým qonaqtaryn politsiiadaǵy robot it arnaiy qarsy aldy. Dronnyń kómegimen aýmaqty baqylaý jáne quqyq buzýshylyqtardy anyqtaý múmkindikteri kórsetildi. Sonymen qatar qyzmettik itterdiń kómegimen jasyrylǵan esirtki zattaryn tabý, arnaiy jasaq qyzmetkerleriniń kúdiktini ustaý kezindegi taktikalyq ádis-tásilderi kópshilik nazaryna usynyldy. Budan keiin qonaqtar «Jas saqshy» synyby oqýshylarynyń sýret, qolóner kórmelerimen tanysyp, politsiianyń tehnikalyq jabdyqtaryn, taqyryptyq beinematerialdaryn tamashalady.
Forýmnyń resmi bóliminde oblys ákimi Nuralhan Kósherov esirtkige qarsy kúreste memlekettik organdar men qoǵam birigýi kerektigin atap ótti.
– Búgingi basqosýymyzda biz tek esirtki men nashaqorlyqtyń ziiany týraly ǵana emes, jas urpaqtyń bolashaǵy týraly da sóz qozǵaimyz. Memleket basshysy Qasym-Jomart Kemeluly Toqaev Joldaýynda esirtki saýdasy men nashaqorlyqqa qarsy kúrestiń mańyzyna toqtalyp, naqty mindetter júktedi. Óitkeni, esirtki bir adamnyń ómirin ǵana emes, tutas otbasynyń taǵdyryn kúiretedi. Sondyqtan eń aldymen, jastardyń sanasynda oǵan degen úzildi-kesildi qarsylyq qalyptastyrýymyz qajet. Bul rette jastarǵa qolaily orta usynýdyń mańyzy zor. Búginde Túrkistan oblysynda 950 myńnan astam bala men jas bar. Jastardyń jan-jaqty damýyna, qabiletin shyńdaýyna jaǵdai jasaý maqsatynda oblystyń áleýmettik infraqurylymyn damytýǵa basymdyq berip kelemiz. Oblys qurylǵannan beri 214 densaýlyq saqtaý nysany paidalanýǵa berildi. Sonymen qatar óńirdiń mádeni infraqurylymyn damytý aiasynda 26 mádeniet úii men klýbtyń qurylysy júrgizildi. Búginde oblystaǵy 801 eldi mekenniń 249-y mádeniet nysandarymen qamtylǵan. Óńirde 3595 sport nysany jumys isteidi. Biyl 58 sport nysanyn paidalanýǵa berý josparlanǵan. Búgingi tańda onyń 31-i el igiligine tapsyryldy. Munyń barlyǵy jastardyń deni saý, bilimdi, mádenietti ári belsendi bolyp qalyptasýyna jasalyp jatqan jaǵdai. Jastarymyz aman, bolashaǵymyz jarqyn bolsyn! – dedi Nuralhan Kósherov.
Al Túrkistan oblysy Politsiia departamentiniń bastyǵy Arystanǵani Zapparov óz sózinde Memleket basshysy aiqyndaǵan «Zań men tártip» qaǵidatynyń mańyzdylyǵyna toqtalyp, esirtki qylmysyna qarsy kúreste politsiianyń júieli jumysy men qoǵamnyń birlesken áreketi sheshýshi ról atqaratynyn atap ótti. Sondai-aq esirtki saýdasymen ainalysatyndarǵa zań aiasynda qatań shara qoldanylatynyn, al jastarǵa durys baǵyt-baǵdar berip, qaýipsiz orta qalyptastyrý ortaq mindet ekenin jetkizdi. Ol ustazdar men ata-analardy jasóspirimderdiń tárbiesine beijai qaramaýǵa shaqyryp, jastardy ońai tabysqa qyzyqpai, bilim men adal eńbekke umtylýǵa úndedi.
Forýmnyń spikerler alańynda qatysýshylar jastardyń quqyqtyq mádenietin qalyptastyrý, sanaly tańdaý jasaý, azamattyq belsendiligin arttyrý, bos ýaqytyn tiimdi uiymdastyrý jáne esirtkige qarsy kózqarasty nyǵaitý máselelerin talqylady. Spikerler qatarynda Gúlishan Nahbaeva, Oljas Súleimen, Abai Júsipov jáne Esen Eleýken boldy.
Jiyn barysynda Qazaqstan Respýblikasy Ulttyq ulanynyń erler hory patriottyq ánder oryndady. Forýmnyń qorytyndy bóliminde ánshi, «Daryn» memlekettik jastar syilyǵynyń laýreaty Ibragim Eskendir men «Altyn dombyra» jas dombyrashylar ansambli óner kórsetti.
Aita keteiik, onkúndik aiasynda Túrkistan oblysynyń aýdan-qalalarynda politsiia qyzmetkerleriniń qatysýymen jastarmen kezdesýler, profilaktikalyq aktsiialar men túsindirý sharalary uiymdastyryldy.
Memleket basshysy Qasym-Jomart Toqaevtyń esirtkimen kúresti kúsheitý jónindegi tapsyrmalary men Ishki ister ministri Erjan Sádenovtiń talaptaryn basshylyqqa alǵan Túrkistan oblysynyń politseileri 2026 jyldyń 10 aiynda 332 quqyq buzýshylyqty anyqtap, zańsyz ainalymnan 1 tonnaǵa jýyq esirtki tárkiledi. Sonymen qatar 1360 internet-resýrs buǵattalyp, 2 320 bank kartasynyń ainalymyna shekteý qoiyldy, esirtkini jarnamalaityn 515 graffiti jazbasy joiyldy. Aldyn alý baǵytynda 1300-ge jýyq profilaktikalyq is-shara ótkizilip, oǵan 144 myńnan astam adam qamtylǵan.
