Barlyq zamanda halyqty biriktirýdiń basty quraldarynyń biri til bolǵan jáne solai bolyp qala beredi. Bul týraly Qazaqstan Halyq Keńesiniń múshesi, «VAINAH» sheshender men ingýshtar respýblikalyq etnomádeni birlestigi qaýymdastyǵy» zańdy tulǵalar birlestiginiń teń tóraǵasy Ahmet Muradov aitty. Onyń sózinshe elimizdegi ózge etnos ókilderi Qazaqstan halqynyń ajyramas bóligi.
«Túrli tarihi sebepterge bailanysty taǵdyrymyz qazaq jerimen bailanysyp, bul meken biz úshin Otanǵa ainaldy.
Sonymen birge belgili bir tarihi kezeńde qazaq halqynyń óz tarihi otanynda azshylyqqa ainalǵanyn da umytpaýymyz kerek. Buǵan qýǵyn-súrgin, deportatsiia, kóshi-qon jáne basqa da qaiǵyly tarihi úderister sebep boldy.
1990 jylǵy 25 qazanda Memlekettik egemendik týraly deklaratsiianyń qabyldanýy jáne 1991 jylǵy 16 jeltoqsanda táýelsizdiktiń jariialanýy Qazaqstannyń búkil halqy úshin tarihi oqiǵa boldy. Bul sheshimder tek qazaq halqynyń ǵana emes, Qazaqstandy óz Otany sanaityn árbir azamattyń igiligi úshin qabyldandy. Sonymen birge qazaq halqy úshin táýelsizdik tarihi ádilettiliktiń saltanat qurýyn, ózin-ózi bileý quqyǵynyń júzege asýyn jáne ulttyq mádenieti men dástúrlerin, eń aldymen, ana tilin jańǵyrtýǵa múmkindik berdi.
Sondyqtan qazaq tilin damytý máselesin tek til saiasaty aiasynda ǵana emes, qazaqstandyq biregeilikti nyǵaitý men patriotizmdi tárbieleýdiń asa mańyzdy faktory retinde qarastyrý qajet», – dedi Ahmet Muradov.
Aita keteiik, «Qazaq tili» halyqaralyq qoǵamynyń X quryltaiynda Prezident Qasym-Jomart Kemeluly Toqaev memlekettik tildi ult birliginiń myzǵymas tuǵyry ekenin aitqan bolatyn. Ol óz sózinde qazaq tilin óte jaqsy deńgeide meńgergen ózge ult ókilderin airyqsha atap ótken.
«Olardyń arasynda qazaq tilin úiretýmen ainalysatyn bilikti mamandar bar. Áleýmettik jeli arqyly tilimizdi dáriptep júrgen azamattar da az emes. Mundai adamdar tilimizdiń damýyna ún qosyp, onyń jarqyn keleshegin naqty ispen jasap jatyr. Solardyń eńbegin biz syilastyqpen, rizashylyqpen qabyldaýymyz kerek», – degen bolatyn Prezident.
