Qazaqstannyń bes qalasynda árqaisysy 200 tósekke arnalǵan zamanaýi balalar aýrýhanasy salynady. Meditsinalyq mekemeler Atyraý, Aqtóbe, Almaty, Shymkent jáne Qaskeleń qalalarynda boi kóteredi. Jobalarǵa sáikes, balalar óz óńirinde mamandandyrylǵan meditsinalyq kómek ala alady, dep habarlaidy ult.kz.
Aýrýhanalardyń qurylysy máselesi Densaýlyq saqtaý vitse-ministri Timýr Mýratovtyń Aziia damý banki jáne Aziia infraqurylymdyq investitsiialar banki ókilderimen kezdesýinde talqylandy.
Vitse-ministrdiń aitýynsha, negizgi maqsat – balalardyń turǵylyqty jerine qaramastan, sapaly meditsinalyq kómekke qol jetkizýine jaǵdai jasaý. Jańa aýrýhanalar óńirlerdegi balalar meditsinasynyń múmkindikterin keńeitpek.
Almatyda taǵy bir iri gospital salynýy múmkin
Budan bólek, Almaty qalasynda 500 tósektik respýblikalyq ǵylymi balalar gospitalin salý máselesi qarastyrylyp jatyr. Densaýlyq saqtaý ministrligi bul joba boiynsha da halyqaralyq qarjy uiymdarymen áriptestik ornatý múmkindikterin pysyqtaýda.
Qazir ministrlik múddeli memlekettik organdarmen birlesip, jobalyq qujattamany ázirleý jáne qarjylandyrý tetikterin anyqtaý jumystaryn júrgizip jatyr.
Kezdesý barysynda Qazaqstandaǵy meditsinalyq kómekti josparlaý men uiymdastyrý júiesin jetildirýge baǵyttalǵan HOPE tehnikalyq kómek jobasy da talqylandy.
Taraptar investitsiialyq baǵdarlamany daiyndaý jáne ony iske asyrýdyń kelesi kezeńderi boiynsha birlesken jumysty jalǵastyrýǵa kelisti. Jobalar balalarǵa turǵylyqty óńirinde zamanaýi meditsinalyq kómek kórsetý múmkindigin arttyrýǵa baǵyttalǵan.
