Oralda politsiia qyzmetkeriniń elektrondyq tsifrlyq qoltańbasyn (ETsQ) paidalanyp, turǵynǵa zańsyz aiyppul salynǵan. Sot isti qaraý barysynda politsiia qyzmetindegi óreskel zańbuzýshylyqtardy anyqtap, aiyppuldyń kúshin joidy, dep habarlaidy ult.kz.
«Moi gorod» basylymynyń málimetinshe, Oral qalasynyń ákimshilik quqyq buzýshylyqtar jónindegi mamandandyrylǵan sotynda qaralǵan is boiynsha áieldiń ózine qatysty ákimshilik hattama toltyrylǵanynan múlde habarsyz bolǵany anyqtaldy. Oǵan istiń qaralatyn ýaqyty men orny da eskertilmegen. Buǵan qosa, politsiia qyzmetkerleri onyń kinásin rastaityn dálelderdi sotqa usyna almaǵan.
Isti qaraý kezinde politsiia inspektory óziniń ETsQ qupiia kiltin basqa adamǵa bergenin moiyndaǵan. Al álgi adam qyzmetkerdiń elektrondyq qoltańbasyn paidalanyp, onyń atynan ákimshilik quqyq buzýshylyq týraly qaýlylar rásimdegen.
Sondai-aq politsiia sottyń suraýlaryna tiisti jaýap bermei, quqyq buzýshylyq deregin de, áieldi isti qaraý úshin bólimshege shaqyrǵanyn da dáleldei almaǵan.
Osyǵan bailanysty sot zańsyz salynǵan aiyppuldyń kúshin joiyp, Batys Qazaqstan oblystyq politsiia departamentiniń basshylyǵyna jeke qaýly shyǵardy.
Endi vedomstvo basshylyǵy qyzmettik tekseris júrgizip, elektrondyq qaýlylardy is júzinde kim toltyrǵanyn, bógde adamnyń politseidiń ETsQ-syna qalai qol jetkizgenin jáne mundai zańbuzýshylyqqa ne sebep bolǵanyn anyqtaýy tiis.
