Belgili rejisser Aqan Sataevtyń qazaq halqynyń asharshylyq jyldaryndaǵy qasiretti taǵdyryn beineleitin "Kúlpásh" filminiń tusaýkeseri keiinge shegerildi. Bul týraly SATAIFILM kinostýdiiasy málimdedi, dep habarlaidy ult.kz.
Bastapqy jospar boiynsha, kartinanyń alǵashqy kórsetilimi 10 qarashada Almatydaǵy Forum saýda ortalyǵynda ornalasqan kinoteatrda ótýi kerek edi. Al 11 qarashadan bastap týyndyny elimizdiń barlyq kinoteatrlarynda kórsetý kózdelgen bolatyn. Alaida kópten kútken premeraǵa sanaýly saǵat qalǵanda onyń ótpeitini habarlandy.
Kinostýdiia ókilderi mundai sheshimniń qabyldanýyna qajetti rásimderdiń áli tolyq aiaqtalmaýy sebep bolǵanyn túsindirdi. Degenmen naqty qandai qujattar nemese talaptar týraly sóz bolyp otyrǵanyn ashyp aitpady.
"Barlyq qajetti rásimdi aiaqtaý úshin bizge qosymsha ýaqyt qajet. Osy mańyzdy keshti bizben birge ótkizýge niettengen jandardan keshirim suraimyz. Túsinistik tanytyp, qoldaý bildirgenderińizge alǵys aitamyz. Ázirge premera men prokatty shamamen bir aptaǵa shegerýdi josparlap otyrmyz", – delingen kinostýdiianyń habarlamasynda.
Osylaisha, filmniń tusaýkeseri de, kinoteatrlardaǵy kórsetilimi de ýaqytsha toqtatyldy. Jańa kún ázirge belgilengen joq. Uiymdastyrýshylar naqty merzimdi keiinirek jariialaýǵa ýáde berdi.
Film ne týraly?
"Kúlpásh" filmi – qazaq ádebietiniń kórnekti ókili, saiasi qýǵyn-súrgin qurbany Beiimbet Mailinniń attas shyǵarmasy boiynsha túsirilgen tarihi týyndy. Kartinada asharshylyq jyldarynda kúnkóristen taryqqan qazaq otbasynyń aýyr taǵdyry sýretteledi. Basty keiipker Kúlpásh kúieýi men kishkentai ulyn ashtyqtan aman alyp qalýǵa tyrysady. Alaida joqshylyq ábden qajytqan otbasy kún ótken saiyn tyǵyryqqa tirele túsedi. Úi ishin asyraýǵa shamasy jetpegen kúieýi birtindep úmitin úzse, Kúlpásh balasynyń ómirin saqtap qalý úshin janyn qinaityn aýyr sheshim qabyldaýǵa májbúr bolady. Filmde ananyń perzentine degen sheksiz mahabbaty, otbasy úshin tartqan azaby jáne asharshylyqtyń adam ómirine salǵan óshpes jarasy kórsetiledi.
Tarihi týyndydaǵy basty rólderdi Gúlmira Hasanova, Erkebulan Daiyrov, Baikenje Belbaev jáne basqa da akterler somdaǵan.
Kinostýdiianyń resmi habarlamasynan keiin jeli qoldanýshylary túrli pikir bildirdi. Biri shyǵarmashylyq ujymǵa qoldaý kórsetip, filmniń jaryqqa shyǵýyn asyǵa kútetinin jazsa, endi biri premeranyń aiaqastynan keiinge qalýyna naqty ne sebep bolǵanyn bilgisi keldi.
Ázirge kinostýdiia qosymsha rásimderdi aiaqtaý qajettiginen basqa túsinikteme bergen joq. Sondyqtan film kórsetiliminiń shegerilýine qatysty ózge boljamdar resmi túrde rastalmaǵan.
