Qazaqstannyń eńbek sińirgen ártisi Baǵdat Sámedinova "Kóremiz" tok-shoýynda jeke ómirindegi qiyn kezeńderdi eske alyp, burynǵy kúieýimen nelikten ajyrasqanyn sóz etti, dep habarlaidy ult.kz.
Baǵdarlama barysynda ánshiniń bala kúnnen birge ósken qurbysy Ásetkúl Sárieva onyń kópshilik bile bermeitin taǵdyry týraly áńgimeledi. Ol Baǵdat Sámedinovanyń eki qyzyn jalǵyz ósirip, talai qiyndyqty bastan ótkergenin aitty.
"Qazirgi ómirin aityp kúlip otyrmyz. Biraq Baǵdattyń otyrǵan otyrysynda qanshama qiynshylyqtar basynan ótti. Ómiri qiyn boldy. Biraq sonyń bárine tóze bildi. Tipti kontsertke kiip shyǵatyn kiim tappaǵan kezi de boldy. Tistep júrip eki qyzdy baǵyp, eshteńeden kem qylmai ósirdi", – dedi Ásetkúl Sárieva.
Qurbysynyń sózin jalǵaǵan ánshi qyzdary mektepte oqyp júrgen kezde otbasynyń bar aýyrtpalyǵy óz moinyna túskenin jetkizdi. Onyń aitýynsha, sol jyldary burynǵy kúieýinen eshqandai qoldaý kórmegen.
"Balalarǵa ózim anamyn, ózim ákemin. Bul nárse balalar mektep oqyp júrgen kezde boldy. Burynǵy joldasymnan qoldaý da bolǵan joq. Qaita ony men jetektep júrdim", – dedi óner iesi.
Soǵan qaramastan, ánshi qyzdarynyń ákesimen aralasýyna qarsy bolmaǵan. Qazir burynǵy kúieýi men qyzdary bir-birimen habarlasyp, sóilesip turady eken.
"Qazir ol kisi bar. Qyzdarmen sóilesip turady. Ákesi ǵoi endi. Ózderi habarlasady bir-birimen. Maǵan ol jaǵyn aita bermeidi", – dedi Baǵdat Sámedinova.
Áńgime barysynda júrgizýshi ánshiden burynǵy jarynyń satqyndyǵyn keshire alǵan-almaǵanyn surady. Bul saýalǵa óner iesi ótken ómirindegi ókpe-renishtiń áli de umytylmaǵanyn ańǵartty.
"Keshirmegendikten osyndai bolyp otyrmyz ǵoi. Qalai keshiresiń? Kóp nárseni aitpai-aq qoiaiynshy. Ol ótken nárse", – dep jaýap berdi ánshi.
Osylaisha, Baǵdat Sámedinova burynǵy otbasylyq ómirine qatysty kóp jaitty ashyp aitqysy kelmeitinin bildirdi. Qansha qiyndyq kórse de, eki qyzyn qatarynan kem qylmai ósirgen ánshi búginde ótken ómiriniń keibir estelikterin qozǵamaýdy jón kóredi.
Baǵdat Sámedinova kim?
Baǵdat Sámedinova – qazaq estradasynyń belgili ánshisi, Qazaqstan Respýblikasynyń eńbek sińirgen ártisi. Ol 1954 jyly 5 aqpanda Jambyl oblysynyń Merki aýdanynda dúniege kelgen.
1975 jyly Almatydaǵy Respýblikalyq estrada óneri stýdiiasyn támamdap, keiin ál-Farabi atyndaǵy Qazaq memlekettik ýniversitetinde bilim alǵan. Óner jolyn "Qazaqkontsert" uiymynda jalǵastyryp, uzaq jyldar boiy qazaq án óneriniń damýyna úles qosqan.
1985 jyly respýblikalyq "Jiger" festivaliniń laýreaty atanyp, Qyrǵyzstanda ótken A. Maldybaev atyndaǵy halyqaralyq óner baiqaýynda jeńiske jetken. Sondai-aq "Sazgen" ansambliniń quramynda Italiiadaǵy folklorlyq festivaldiń bas júldesin ielengen.
Ónerdegi eńbegi úshin 1995 jyly Qazaqstannyń eńbek sińirgen ártisi ataǵyn alyp, 2011 jyly "Qurmet", 2021 jyly "Parasat" ordenderimen marapattalǵan.
