Tanymal prodiýser Baian Alagózova Japoniiaǵa sapary kezinde adaldyqtyń simvolyna ainalǵan Hatiko esimdi ittiń oqiǵasyn eske alyp, erekshe áserge bólendi. Ol janýarlar týraly muńdy filmderdi kórý ózine aýyr tietinin aityp, júrekjardy jazba jariialady, dep habarlaidy ult.kz.
Prodiýser áleýmettik jelidegi paraqshasynda itterdiń adaldyǵy týraly oqiǵalarǵa beijai qarai almaitynyn jetkizdi. Ásirese "Aq Bim Qara qulaq" filminiń júregine qatty áser etkenin jasyrmady. Baian Maqsatqyzy bul týyndyny ómirinde bir-aq ret kórgen. Filmniń aianyshty oqiǵasy janyna aýyr tigeni sonshalyq, ózine ony endi eshqashan qaita kórmeýge ýáde bergen.
"Janymdy qatty jaralaǵan, eń unatpaityn filmim – "Aq Bim Qara qulaq". Ony bir-aq ret kórdim. Sol kezde júregim qars aiyrylǵandai boldy. Sodan keiin ózime bul filmdi endi eshqashan qaitalap kórmeimin dep ýáde berdim. Al ekinshi film – "Hatiko". Ony eseigen shaǵymda kórýge táýekel ettim. Biraq endi qaitalap kórmeimin. Nelikten ekenin bilmeimin, itterdiń basynan ótken qaiǵyly oqiǵalar janyma erekshe batady. Hatiko iesin on jyl boiy dál osy jerde kútti. Oilańyzshy, ol bar bolǵany it qoi", – dep jazdy prodiýser.
Sondai-aq Baian Alagózova janýarlarǵa, ásirese itterge qatygezdik tanytatyn adamdardy túsinbeitinin aitty. Onyń sózinshe, janýarlarǵa jaman qaraityn jandarmen aralasqysy kelmeidi.
Prodiýserdiń bul jazbasy áleýmettik jeli qoldanýshylarynyń da kóńilin bosatty. Kópshilik onyń pikirimen kelisip, filmnen alǵan áserlerimen bólisti.
Aita keteiik, Hatiko – iesine degen sheksiz adaldyǵymen álemge tanylǵan it. Ol iesi qaitys bolǵannan keiin de Japoniiadaǵy Sibýia stantsiiasyna jyldar boiy kelip, ony kútken. Bul oqiǵa keiin birneshe kórkem týyndyǵa arqaý bolyp, Hatiko adaldyq pen súiispenshiliktiń simvolyna ainaldy.
Baian Alagózova kim?
Baian Maqsatqyzy Alagózova – qazaqstandyq tanymal prodiýser, aktrisa, telejúrgizýshi jáne kásipker. Ol 1974 jyly 9 qańtarda Oral qalasynda dúniege kelgen.
Eńbek jolyn jýrnalistika salasynda bastap, keiin kino jáne shoý-bizneske bet burǵan. 1993 jyly rejisser Talǵat Temenovtiń "Mahabbat beketi" filminde Gúlnázdiń rólin somdap, kópshilikke tanyldy.
Keiin "Ǵashyq júrek", "Ǵashyq júrek 2" sekildi filmderdiń jaryqqa shyǵýyna atsalysty.
Baian Alagózova – qazaqstandyq tanymal KeshYOU qyzdar tobynyń negizin qalaýshy ári Shine Production prodiýserlik ortalyǵynyń jetekshisi.
2025 jyly oǵan Qazaqstannyń eńbek sińirgen qairatkeri ataǵy berildi.
