Qazaqstandyqtardyń 58 paiyzynda jeke jinaq joq. Al árbir úshinshi otbasynyń ailyq tabysy 150–300 myń teńge aralyǵynda. Bul Ulttyq banktiń qazan aiynda júrgizgen saýalnamasynda belgili boldy, dep habarlaidy ult.kz NUR.KZ-ke silteme jasap.
Zertteýge Qazaqstannyń 18 jastan asqan 1500 turǵyny qatysqan. Saýalnama barysynda azamattardyń otbasylyq tabysy, sońǵy bir jyldaǵy materialdyq jaǵdaiynyń ózgerýi jáne aqsha jinaǵynyń bar-joǵy anyqtalǵan.
Qazaqstandyq otbasylar qansha tabys tabady?
Saýalnamaǵa qatysqandardyń eń kóp bóligi – 30,4 paiyzy otbasynyń ailyq tabysy 150–300 myń teńge aralyǵynda ekenin aitqan.
Al respondentterdiń:
- 23,4 paiyzy – 300–500 myń teńge;
- 13,8 paiyzy – 500 myń teńgeden astam;
- 12,9 paiyzy – 100–150 myń teńge;
- 6,4 paiyzy – 70–100 myń teńge;
- 3,5 paiyzy – 40–70 myń teńge;
- 5,1 paiyzy – 40 myń teńgege deiin tabys tabatynyn kórsetken.
- Taǵy 4,6 paiyzy otbasylyq tabysyn naqty aita almaǵan.
Árbir úshinshi adamnyń qarjylyq jaǵdaiy nasharlaǵan
Saýalnamaǵa qatysqandardyń 48,9 paiyzy sońǵy 12 aida materialdyq jaǵdaiy aitarlyqtai ózgermegenin aitqan.
Al 31,3 paiyzy qarjylyq jaǵdaiy nasharlaǵanyn málimdegen. Tek 14,8 paiyzy tabysy jaqsarǵanyn jetkizgen.
Osylaisha, qarjylyq jaǵdaiy nasharlaǵandardyń úlesi jaqsarǵanyn aitqandardan eki ese kóp.
Qazaqstandyqtardyń qanshasynda aqsha jinaǵy bar?
Zertteýde azamattardyń jeke jinaǵy da suralǵan. Nátijesinde respondentterdiń 58 paiyzy aqsha jinamaitynyn aitqan. Al 28,8 paiyzynyń jeke jinaǵy bar.
Salystyrý úshin aitsaq, qyrkúiek aiynda aqsha jinaǵy joq azamattardyń úlesi 60,3 paiyz bolǵan.
Aita keteiik, bul nátijeler saýalnamaǵa qatysqan azamattardyń jaýaptaryn kórsetedi. Ony Qazaqstandaǵy barlyq otbasynyń tabysy týraly resmi statistika dep qabyldaýǵa bolmaidy.
