Qazaqstanda 2027 jylǵy 1 qańtardan bastap bala kútimi, kópbalaly otbasylarǵa jáne nagradtalǵan analarǵa beriletin járdemaqylardy taǵaiyndaý men tóleý tártibi ózgeredi. Jańa erejege sáikes, keibir otbasylardyń áleýmettik tólemderi ýaqytsha toqtatylýy múmkin, dep habarlaidy ult.kz Lada.kz-ke silteme jasap.
Eńbek jáne halyqty áleýmettik qorǵaý ministri tiisti buiryqqa 2026 jylǵy 30 qazanda qol qoiǵan. Ózgeristerdiń negizgi bóligi 2027 jylǵy 1 qańtardan, al keibiri 2026 jylǵy 18 qarashadan bastap kúshine enedi.
Qandai jaǵdaida járdemaqy toqtatylady?
Jańa tártip boiynsha járdemaqy alatyn otbasylardyń ál-aýqaty Otbasynyń tsifrlyq kartasy arqyly tekseriledi.
Eger bala kútimi boiynsha járdemaqy, kópbalaly otbasylarǵa beriletin tólem nemese nagradtalǵan analarǵa arnalǵan járdemaqy alatyn otbasy ál-aýqat deńgeii boiynsha A nemese V sanatyna jatqyzylsa, tólem kelesi aidyń birinshi kúninen bastap toqtatylady.
Al otbasynyń sanaty S, D nemese E deńgeiine ózgerse, járdemaqy jańartylǵan málimet alynǵannan keiingi aidyń birinshi kúninen bastap avtomatty túrde qaita tólenedi.
Otbasynyń ál-aýqaty týraly aqparat járdemaqy taǵaiyndaý júiesine ai saiyn jiberilip otyrady.
Járdemaqy toqtatylýy múmkin basqa jaǵdailar:
- alýshynyń bank shotynda úsh ai nemese odan da kóp ýaqyt boiy shyǵys operatsiialary bolmasa;
- Qazaqstannan turaqty turýǵa shetelge kóship ketse;
- shetel azamatynyń nemese qandastyń qujattarynyń jaramdylyq merzimi aiaqtalsa;
- alýshy statsionarlyq áleýmettik qyzmet kórsetý mekemesinde tolyq memlekettik qamtamasyz etýde bolsa;
- bas bostandyǵynan aiyrý jazasyn ótep jatsa.
Kópbalaly otbasylar úshin taǵy bir negiz qarastyrylǵan. Eger balalardyń biri 18 jasqa tolsa, járdemaqy toqtatylýy múmkin. Alaida ol kúndizgi bólimde bilim alýdy jalǵastyrsa, tólem 23 jasqa tolǵanǵa deiin qaita taǵaiyndalýy múmkin.
Járdemaqy tóleýdi toqtatýǵa sebep bolǵan jaǵdai joiylyp, azamattyń tólem alýǵa quqyǵy saqtalsa, aqsha qaita tólenedi.
Járdemaqy rásimdeý úshin qosymsha kelisim qajet
Jańa erejege sáikes, ótinish berýshiler jeke derekterin jinaýǵa, óńdeýge jáne tekserýge kelisim berýi kerek. Onyń ishinde banktik qupiiaǵa jatatyn málimetter de bar.
Sondai-aq kredittik biýrodan nesie boiynsha bereshek, ai saiynǵy tólemder men merzimi ótken mindettemeler týraly aqparat alýǵa kelisim talap etiledi.
Eger ótinish berýshi mundai kelisim bermese, járdemaqy taǵaiyndaý týraly ótinishi qabyldanbaidy.
Qujattaǵy qatelerdi túzetýge múmkindik beriledi
2026 jylǵy 18 qarashadan bastap qujattardaǵy qatelerdi túzetýge nemese jetispeitin qujattardy tolyqtyrýǵa múmkindik beriledi.
Ol úshin ótinish berýshige eki jumys kúni beriledi. Bul ýaqyt memlekettik qyzmet kórsetý merzimine qosylmaidy.
Eger azamat osy merzimde kemshilikterdi túzetse, ótinish berilgen bastapqy kún saqtalady. Al belgilengen ýaqytta túzetpese, ótinishti qabyldaýdan bas tartylady.
Ata-analar úshin taǵy qandai ózgerister bar?
Bala kútimi boiynsha járdemaqy bala týǵan kúnnen bastap bir jarym jasqa tolǵanǵa deiin tólenedi. Bala asyrap alýshylar men qorǵanshylar úshin bólek sharttar qarastyrylǵan.
Kópbalaly otbasynyń quramyn anyqtaǵanda týǵan, asyrap alynǵan, qorǵanshylyqtaǵy balalar, sondai-aq basqa ata-anasynyń otbasynda esepke alynbaǵan ógei balalar da eskeriledi.
Buǵan qosa, balanyń týý týraly kýáligi, oqý ornynan anyqtama jáne bank shoty týraly málimetter memlekettik tsifrlyq júielerde bolsa, olardy qaǵaz túrinde qaita tapsyrý qajet bolmaidy.
Bala dúniege kelgen kezde ata-analar týýyna bailanysty beriletin birjolǵy járdemaqy men bala kútimi boiynsha tólemdi bir keshendi memlekettik qyzmet aiasynda qatar rásimdei alady.
Sondai-aq azamattarǵa járdemaqydan óz erkimen bas tartý quqyǵy beriledi. Keiin qaita ótinish bergen jaǵdaida tólem jańa ótinish tapsyrylǵan kúnnen bastap taǵaiyndalady.
