Qazaqstanda shetel azamattary men azamattyǵy joq adamdarǵa jeke sáikestendirý nómirin (JSN) smartfon arqyly alý múmkindigi paida boldy. Qyzmet elge ýaqytsha kelgen azamattarǵa qoljetimdi, dep habarlaidy ult.kz Lada.kz-ke silteme jasap.
Ishki ister ministri tiisti buiryqqa 2026 jylǵy 2 qarashada qol qoiǵan. Qujat 9 qarashadan bastap kúshine endi. Endi sheteldikter JSN-di alǵash ret rásimdeý nemese burynǵy derekterin túzetý úshin QazETA mobildi qosymshasyn paidalana alady. Qyzmet MAQ tsifrlyq kóshi-qon platformasy arqyly kórsetiledi.
JSN-di qalai rásimdeýge bolady?
Ol úshin shetel azamaty QazETA qosymshasyna tirkelip nemese jeke kabinetine kirýi kerek. Sodan keiin:
- jeke derekterdi jinaýǵa jáne óńdeýge kelisim berý;
- jeke basyn kýálandyratyn qujatty sýretke túsirý;
- biometriialyq tekserýden ótý;
- smartfonnyń geolokatsiiasyn rastaý;
- adamnyń tiri ekenin anyqtaityn qosymsha tekserýden (Liveness) ótý;
- avtomatty túrde toltyrylǵan málimetterdi tekserip, týǵan jeri, bailanys derekteri men ultyn kórsetý;
- ótinimdi rastaý jáne jiberý qajet.
Budan keiin «Búrkit» júiesi ótinish berýshiniń Qazaqstanǵa kirgen-kirmegenin tekseredi. Sondai-aq onyń biometriialyq derekteri immigranttar bazasymen salystyrylyp, buryn JSN berilgen-berilmegeni anyqtalady.
JSN qansha ýaqytta beriledi?
Qyzmet kórsetý merzimi – ótinim berilgen kúndi eseptemegende bir jumys kúni.
Ishki ister ministrliginiń qyzmetkeri qujattar men jeke derekterdi teksergennen keiin ótinish berýshige JSN beriledi.
Ótinimniń mártebesin QazETA qosymshasyndaǵy MAQ platformasynan kórýge bolady. JSN rásimdelgen soń tirkeý týraly kýálikti júktep alýǵa múmkindik bar.
Qandai jaǵdaida ótinim qabyldanbaidy?
Eger usynylǵan málimetter belgilengen talaptarǵa sáikes kelmese nemese qujattar men ondaǵy derekterdiń shynaiylyǵy rastalmasa, JSN berýden bas tartylýy múmkin. Mundai jaǵdaida ótinish berýshige tiisti habarlama jiberiledi.
Pilottyq joba Qazaqstannyń búkil aýmaǵynda qoldanylady. Ol respýblikada ýaqytsha júrgen shetel azamattary men azamattyǵy joq adamdarǵa arnalǵan.
