Almaty halyqaralyq áýejaiynda qurylys jumystary kezinde merdiger uiymnyń qyzmetkeri qaza tapty. Osy oqiǵaǵa bailanysty Kóliktegi politsiia departamenti qylmystyq is qozǵady, dep habarlaidy ult.kz.
Departamenttiń málimetinshe, is adam ólimine ákep soqqan eńbekti qorǵaý qaǵidalaryn buzý deregi boiynsha tirkelgen.
Qazir oqiǵanyń mán-jaiyn jan-jaqty ári obektivti anyqtaý úshin qajetti tergeý amaldary júrgizilip jatyr. Tergeý múddesine bailanysty ázirge ózge aqparat jariialanbaidy.
Almaty halyqaralyq áýejaiynyń baspasóz qyzmeti qaiǵyly oqiǵanyń qurylys jumystary júrgizilip jatqan perron aýmaǵynda bolǵanyn habarlady.
«Oqiǵa saldarynan qurylys jumystaryn júrgizip jatqan merdiger uiymnyń bir qyzmetkeri mert boldy. Almaty halyqaralyq áýejaiy ýákiletti memlekettik organdarǵa qajetti kómek kórsetip, júrgizilip jatqan tergeý aiasynda olarmen ózara is-qimyl jasaidy», – delingen áýejaidyń resmi habarlamasynda.
