Almatyda tolassyz jaýǵan jańbyrdan keiin «Alataý» metro stantsiiasynyń soltústik kireberisin sý basty. Jerasty ótkeline qarai aqqan sýdyń videosy áleýmettik jelilerde tarady. Metropoliten ókilderi oqiǵany rastady, dep habarlaidy ult.kz.
11 qarasha kúni tańerteń Abai dańǵyly men Jarokov kóshesiniń qiylysynda sý jinalyp, jaiaý júrginshilerdiń qozǵalysyna kedergi keltirgen. Áleýmettik jelide jariialanǵan kadrlardan sýdyń metro stantsiiasyna aparatyn baspaldaq mańyna deiin jetkenin kórýge bolady.
Jeli qoldanýshylarynyń biri jaǵdaiǵa ákimdiktiń nazaryn aýdarýdy surap, jaiaý júrginshiler jolymen júrý qiyndaǵanyn jazǵan. Onyń aitýynsha, jinalǵan sý baspaldaq arqyly metroǵa qarai aqqan.
Almaty metropoliteniniń baspasóz qyzmeti sý basý deregin rastady. Resmi málimetke sáikes, qalalyq sý burý jelisiniń tolyp ketýine bailanysty Abai dańǵylynan tómen ornalasqan «Alataý» stantsiiasynyń soltústik jaiaý júrginshiler ótkelin sý basqan.
Qazir metro mamandary jinalǵan sýdy soryp, aýmaqty tazartý jumystaryn júrgizip jatyr. Metropoliten ókilderi jaǵdai baqylaýda ekenin málimdedi.
Sonymen qatar stantsiia shtattyq rejimde jumys istep tur. Jolaýshylarǵa qyzmet kórsetýge eshqandai shekteý qoiylmaǵan. Basqa metro stantsiialarynda mundai jaǵdai tirkelmegen.
