Almatyda 10 qarasha keshinen beri jańbyr jaýyp jatyr. «Qazgidromet» RMK málimetinshe, 11 qarasha saǵat 10:00-degi jaǵdai boiynsha qalada 23 mm, Medeý aýdanynda 26 mm, al Kamen ústirtinde 36 mm jaýyn-shashyn túsken. Qazir kommýnaldyq qyzmetter kúsheitilgen rejimde jumys istep, kósheler men aýlalardaǵy sý basqan ýchaskelerdiń saldaryn joiýda, dep habarlaidy ult.kz.
Almaty qalasynyń Kommýnaldyq infraqurylym jáne turǵyn úi inspektsiiasy basqarmasynyń málimetinshe, túnde qalanyń birneshe aýdanynda sý jinalǵany tirkelgen.
Qolaisyz aýa raiynyń aldyn alý jáne onyń saldaryn joiý úshin jalpy sany 1 579 adamnan turatyn 85 jedel brigada kezekshilikke shyqqan. Jumysqa 415 arnaiy tehnika men 97 motopompa jumyldyrylǵan. Sondai-aq 2 950 qap qum daiyndalǵan. Kúndelikti jumysqa 3 253 jol jumysshysy shyǵady.
Sinoptikterdiń boljamynsha, 11 qarashada jańbyr táýlik sońyna deiin úzilispen jaýady. Taǵy 10 mm-ge deiin jaýyn-shashyn túsýi múmkin. Jel ekpini sekýndyna 15–20 metrge deiin jetedi. Kúndiz aýa temperatýrasy +5…+7 °C bolady.
12 qarashada jaýyn-shashynsyz aýa raiy kútiledi. Tuman túsýi múmkin.
Osyǵan bailanysty Almaty turǵyndaryna jolda abai bolý, kólik jyldamdyǵyn tómendetý jáne sý jinalýy múmkin jerlerge avtokólikterin qoimaý usynylady. Qatty jel kezinde aǵashtardyń astynda jáne jarnama qurylymdarynyń mańynda turmaǵan jón.
