Jańa Konstitýtsiianyń negizgi qaǵidattary, ulttyq qundylyqtar men árbir azamattyń jeke jaýapkershiligi ózara qalai bailanysty? Sondai-aq jańa Joldaýda kóterilgen negizgi mindetterdiń máni nede? Bul máseleler Almaty qalasy Ishki saiasat basqarmasynyń Qoǵamdyq damý ortalyǵy uiymdastyrǵan Abai atyndaǵy Qazaq ulttyq pedagogikalyq ýniversitetiniń stýdentterimen ótken kezdesýdiń negizgi taqyrybyna ainaldy.
Ekinshi kýrs stýdentterine arnalǵan dáristi Almaty qalasy Qoǵamdyq damý ortalyǵynyń basshysy Aidar Esenbekov ótkizdi. Kezdesý barysynda jańa Konstitýtsiianyń negizgi qaǵidattary, 2026 jylǵy Joldaýdyń basym baǵyttary, jalpyulttyq qundylyqtar jáne olardyń qazirgi qoǵamdaǵy mańyzy talqylandy.
Dáris barysynda konstitýtsiialyq damý, azamattyq jaýapkershilik jáne ulttyq biregeilikti nyǵaitý máselelerine nazar aýdaryldy. Ásirese Konstitýtsiiada bekitilgen «Zań jáne tártip» qaǵidatynyń máni, onyń quqyqtyq mádenietti qalyptastyrýdaǵy jáne qoǵamdyq normalardy qurmetteýdegi róli keńinen túsindirildi.
«Konstitýtsiia – memlekettiń negizgi zańy ǵana emes, sonymen qatar adam, qoǵam jáne memleket arasyndaǵy qarym-qatynasty aiqyndaityn mańyzdy baǵdar. Onyń qaǵidattary árbir azamattyń kúndelikti ómiriniń ajyramas bóligine ainalǵanda ǵana naqty mánge ie bolady. Jastardyń mindeti – ulttyq qundylyqtardy saqtap qana qoimai, olardy bilimge umtylý, jaýapkershilik, zańdy qurmetteý jáne belsendi azamattyq ustanym arqyly zamanaýi mazmunmen tolyqtyrý», – dep atap ótti Aidar Esenbekov.
Kezdesýdiń jeke bólimi «Taza Qazaqstan» jáne «Adal azamat» jalpyulttyq bastamalaryna arnaldy. Stýdentterge ekologiialyq jaýapkershilik, adaldyq, ainaladaǵy adamdarǵa qurmetpen qaraý jáne qoǵamdyq yntymaqtastyq qazirgi zamanǵy azamat mádenietiniń mańyzdy quramdas bólikteri ekeni túsindirildi.
Sondai-aq uly oishyl Abai Qunanbaiulynyń rýhani murasyna erekshe nazar aýdaryldy. Qatysýshylar shańyraqtyń ulttyq birlik pen urpaqtar sabaqtastyǵynyń simvoly retindegi mánin, sondai-aq uly oishyldyń «Qara sózderinde» kórinis tapqan ideialardyń búgingi qoǵam úshin ózektiligin talqylady. Adamgershilik, ádildik, bilimge umtylý jáne jaýapkershilik búgingi kúni de mańyzyn joǵaltpaǵan qundylyqtar retinde atap ótildi.
Kezdesý sońynda stýdentter óz pikirlerin bildirip, suraqtaryn qoiyp, dáris oqýshymen oi bólisti.
Mundai kezdesýler jastardyń konstitýtsiialyq saýattylyǵyn arttyrýǵa, jalpyulttyq qundylyqtardy dáripteýge jáne belsendi azamattyq ustanymyn qalyptastyrýǵa baǵyttalǵan.
