Qazaqstanda kámpit, pechene, tort jáne basqa da konditerlik ónimderdiń quramyndaǵy transmai mólsherin anyqtaýdyń biryńǵai ádisi bekitildi. Jańa ulttyq standart 2026 jylǵy 1 qarashadan bastap kúshine endi, dep habarlaidy ult.kz.
Buǵan deiin transmai mólsherin anyqtaý úshin qoldanylǵan GOST 31754-2012 standarty negizinen mai ónimderi men taǵam óndirisine arnalǵan shikizatty tekserýge baǵyttalǵan. Al daiyn konditerlik ónimderdiń quramyndaǵy transmaidy anyqtaýdyń biryńǵai ádisi bolmaǵan.
Endi ST RK 4052-2026 ulttyq standarty zerthanalarǵa tátti ónimderdegi transmai mólsherin birizdi ádispen ólshep, nátijelerin ortaq tártippen baǵalaýǵa múmkindik beredi.
QR Saýda jáne integratsiia ministrligi Tehnikalyq retteý jáne metrologiia komitetiniń tóraǵasy Janna Esenbekovanyń aitýynsha, jańa standart ónimderdiń qaýipsizdigin baqylaýdy kúsheitýge, ásirese shetelden ákelinetin táttilerdiń quramyn tekserýge múmkindik beredi.
Qujat 2026 jylǵa arnalǵan Ulttyq standarttaý jospary aiasynda ázirlengen. Ony «QazStandart» daiyndap, Saýda jáne integratsiia ministrliginiń Tehnikalyq retteý jáne metrologiia komiteti bekitti.
Jańa standart tamaq ónimderiniń qaýipsizdigine qatysty Keden odaǵynyń tehnikalyq reglamentterimen úilestirilgen.
