Abai oblysynda bir apta buryn joǵalyp ketken 44 jastaǵy Semei turǵyny Rinat Ahmetovti izdeý jumystary jalǵasyp jatyr. Onyń Lexus LX 570 markaly avtokóligi Borodýliha aýdanyndaǵy jyradan tabylǵan, dep habarlaidy ult.kz.
Oblystyq politsiia departamentiniń baspasóz qyzmetiniń málimetinshe, 1982 jyly 1 shildede týǵan Rinat Ahmetov 4 qarashada úiinen shyǵyp, qaita oralmaǵan. Onyń joǵalǵany týraly 7 qarashada 69 jastaǵy ákesi politsiiaǵa habarlaǵan.
Izdestirý sharalary barysynda 9 qarashada Alekseevka aýylynan shamamen 15 shaqyrym jerdegi jyradan joǵalǵan azamattyń kóligi anyqtalǵan. Alaida Rinat Ahmetovtiń ózi ázirge tabylǵan joq.
Politsiia qyzmetkerleri izdeý jáne jedel-izdestirý sharalaryn jalǵastyryp jatyr. Izdestirý jumystary avtokólik tabylǵan aýmaq pen oǵan irgeles jerlerde júrgizilýde.
Abai oblystyq politsiia departamenti turǵyndardan joǵalǵan azamat nemese onyń kóligi týraly qandai da bir málimet bolsa, dereý 102 nómirine habarlaýdy suraidy.
«Rinat Ahmetovtiń qaida ekeni týraly aqparat biletin nemese 4 qarashadan bastap ony ne atalǵan kólikti kórgen azamattar bolsa, "102" telefonyna habarlasýdy nemese jaqyn mańdaǵy politsiia bólimine júginýdi suraimyz», – delingen politsiia habarlamasynda.
