Елордада Қазақстан Президенті Қасым-Жомарт Тоқаев пен Астанаға ресми сапармен келген Кения Президенті Уильям Руто арасында жоғары деңгейдегі келіссөздер өтті, деп хабарлайды ult.kz.
Тараптар алдымен шағын, содан соң кеңейтілген құрамда кездесіп, екіжақты қарым-қатынасты жаңа деңгейге көтеру мәселелерін талқылады.
Орталық Азия мен Шығыс Африканың байланысы
Мемлекет басшысы Қасым-Жомарт Тоқаев Кенияны Африка құрлығындағы ең маңызды әрі сенімді серіктестердің бірі ретінде атай отырып, бұл сапардың маңызы зор екенін атап өтті. Сапар аясында ірі бизнес өкілдерінен құралған үлкен делегацияның келуі екі ел арасындағы экономикалық ниеттің салмақты екенін көрсетеді.
«Қазақстан Еуразия жүрегінде орын тепкен, ал Кения Шығыс Африканың экономикалық орталығы саналады. Біз нарықтарды және көлік бағдарларын байланыстырып, инвестициялар мен тың мүмкіндіктерге жол ашу арқылы Орталық Азия мен Африка арасына дәнекер бола аламыз», — деді Қасым-Жомарт Тоқаев.
Ынтымақтастықты тереңдету мақсатында Қазақстан тарапы Кения астанасы Найробиде өз елшілігін ашу туралы шешім қабылдады. Бұл қадамды Уильям Руто екі ел байланысын ілгерілетуге деген ерекше маңыз деп бағалады.
Сауда-саттық пен инвестиция: Еуразия нарығына жол
Кения Президенті Уильям Руто өз кезегінде Қазақстанды сауда мен инвестицияны дамытудағы маңызды логистикалық хаб ретінде қарастыратынын жеткізді. Оның айтуынша, Кения өз ауылшаруашылық өнімдерін Қазақстан арқылы Еуразия нарығына экспорттауға мүдделі.
Серіктестікті нығайтудың негізгі бағыттары:
Экономика мен қаржы: Сауда-саттықты арттыру үшін арнайы Іскерлік кеңес құру ұсынылды.
Инновация мен технология: Ақпараттық технологиялар, электрондық үкімет және ғарыш салаларында тәжірибе алмасу.
Инфраструктура: Көлік-логистика және жаңартылатын энергия көздері.
Гуманитарлық сала: Жоғары оқу орындары арасындағы байланыс, туризм бастамалары және биоалуантүрлілікті сақтау.
Жоғары марапат пен Бірлескен мәлімдеме
Келіссөздер қорытындысы бойынша екі ел басшылары Бірлескен мәлімдеме қабылдады. Сапар аясында Қасым-Жомарт Тоқаев Кения Президенті Уильям Рутоға екі ел арасындағы достықты нығайтуға қосқан үлесі үшін І дәрежелі «Достық» орденін салтанатты түрде табыс етті.
«Бұл жоғары марапат — Қазақстанның шексіз құрметі мен ризашылығының, сенім мен өзара құрметке негізделген қарым-қатынасты жандандыру ниетінің белгісі», — деді Қазақстан Президенті.
Уильям Руто бұл марапатты бірлік пен ынтымақтың символы ретінде қабылдап, Кения жұртының да Қазақстан секілді үйлесімді өркендеуге ұмтылатынын баса айтты.
Айта кетейік, Қазақстан мен Кения арасындағы дипломатиялық қарым-қатынас 1993 жылы орнаған. Екі елдің басшылары бұған дейін 2023 жылы Нью-Йорк қаласында өткен БҰҰ Бас Ассамблеясының сессиясы аясында кездесіп, байланыстарды жандандыруға уағдаласқан болатын.
