Роза Әлқожа, Нұрлан Албан және Ақбота Керімбекова сұхбаттарында несие төлейтінін жасырмаған. Ал продюсер Мөлдір Мұқан ай сайынғы төлемі 8 миллион теңге екенін айтқан, деп хабарлайды ult.kz.
Роза Әлқожа
Әнші “Kezdesu” бағдарламасына берген сұхбатында жұрт өнер адамдарының тұрмысын көбіне әлеуметтік желідегі суреттеріне қарап бағалайтынын айтқан. Оның сөзінше, әншілер де өмірінің жақсы сәттерін көрсетуге тырысады. Роза Әлқожа осы әңгімеде өзінің де несиеге жүгінетінін жеткізген.

“Әйтпесе кредиттен кредитке жүргеніңді ешкім білмейді. Мен кредитсіз өмір сүре алмаймын”, – деді әнші.
Сұхбат үзіндісі 2026 жылғы қазанда жарияланған. Әнші қарызының көлемі мен ай сайынғы төлемін атамаған.
Мөлдір Мұқан
Продюсер өзіне 11 миллион теңгеге бриллиант алқа сатып алғанын айтқан видеода несиесі барын да жасырмаған. Оның бұл мәлімдемесі 2026 жылғы қарашада жарияланды.

“Қарызымның барын жасырмаймын. Ай сайын 8 миллион несие төлеймін”, – деді Мөлдір Мұқан.
Нұрлан Албан
Нұрлан Албан 2025 жылғы шілдеде NEGE.kz-ке берген сұхбатында банк алдындағы міндеттемесі барын айтқан.

“Несием бар, төлеп келе жатырмын”, – деген әнші.
Ол өнер адамдарының да ел қатарлы тұрмыс кешетінін жеткізген. Сұхбатта несиенің сомасы мен өтеу мерзімі көрсетілмеген.
Ақбота Керімбекова
Ақбота Керімбекова да сол материалда қажет кезде банкке жүгінетінін айтқан. Әншінің сөзінше, өнер иелерінің бәрінің қаржылық мүмкіндігі бірдей емес.

“Несие төлейтін қазақтардың қатарында мен де бармын”, – деді ол.
Әнші тойға жиі барғанымен, ағайын-туыс пен дос-жаранның қуанышында ақы сұрамайтынын түсіндірген. Өз несиесінің көлемі мен ай сайынғы төлемін атамаған.