24 шілде күні Қазақстан аумағында жазғы ауа райы сақталып, көптеген өңірде жоғары температура тіркеледі, деп хабарлайды ult.kz.
Синоптиктердің болжамынша, елдің басым бөлігінде күн ашық болғанымен, кей аймақтарда атмосфералық тұрақсыздық әсерінен найзағай ойнап, өткінші жаңбыр жаууы мүмкін.
Оңтүстік және оңтүстік-батыс өңірлерде аптап ыстық сақталады. Күндіз ауа температурасы кей жерлерде +35…+40 градусқа дейін көтерілуі ықтимал. Ал солтүстік, шығыс және орталық өңірлерде +25…+33 градус аралығында жылы ауа райы күтіледі.
Еліміздің солтүстік, шығыс және оңтүстік-шығысындағы таулы аудандарда найзағай ойнап, қысқа мерзімді жаңбыр жаууы, екпінді желдің күшеюі және жекелеген жерлерде бұршақ түсуі мүмкін. Сонымен қатар оңтүстік өңірлерде шаңды дауыл қаупі де сақталады.
Мамандар тұрғындарға күннің ең ыстық уақытында ұзақ уақыт далада жүрмеуге, мүмкіндігінше көлеңкеде болып, сұйықтықты көбірек тұтынуға кеңес береді. Сондай-ақ табиғат аясында демалушылар мен диқандарға өрт қауіпсіздігі талаптарын қатаң сақтау қажеттігі ескертіледі.
