Соңғы жылдары мектептердегі түрлі қоштасу кештері қоғамда қызу талқыланып жүр. Әсіресе ата-аналар балабақшамен, Әліппемен, бастауыш сыныппен, 9 және 11-сыныппен қоштасу шараларының шектен тыс даңғазаға айналып кеткеніне наразы, деп хабарлайды ult.kz.
Желі қолданушыларының айтуынша, мұндай мерекелер үлкен қаржылық шығынға әкеліп жатыр. Қымбат киім, сәнді шаш үлгісі, макияж, маникюр, мұғалімдерге сыйлық, фотосессия, мейрамхана жалдау – мұның бәрі ата-аналардың қалтасына айтарлықтай салмақ түсіреді. Кейбір оқушылардың ата-анасынан 101 гүл сұратқаны туралы пікірлер де әлеуметтік желіде талқыға түскен.
Көпшілік мұндай бәсекенің балалар арасында орынсыз түсінік қалыптастыратынын айтады. Олардың пікірінше, мектеп бітіру кештері білім мен тәрбиеден гөрі сән-салтанат жарысына айналып барады.
«Қарапайым мектеп бітірудің өзі үлкен той секілді өтіп жатыр. Ата-аналар бара-бара шығынға батып барады. Мұндай шараларға шектеу қою керек», – деп жазды желі қолданушыларының бірі.
Сондай-ақ жұрт білім басқармалары мен мектеп директорларын осы мәселеге назар аударуға шақырып отыр. Олардың айтуынша, мектеп әкімшілігі артық шығынды талап ететін бастамаларға нақты шектеу қойса, ата-аналар да қысым көрмес еді.
Желіде бұл мәселе бойынша пікір екіге бөлінген. Бірі бұған ата-аналардың өзін кінәласа, енді бірі министрліктің араласуын сұрайды.
