Нұр-Сұлтан қаласында бейсенбіге қараған түні жантүршігерлік жол апатынан бес адам ажал құшты.
Елорда полиция департаментінің баспасөз қызметі оқиға 30 қыркүйекте сағат 00.34-те болғанын хабарлады.
"Toyota Camry автокөлігінің 19 жастағы жүргізушісі Есіл өзені арқылы өтетін көпірден Сарайшық көшесіне қарай жүріп, жылдамдықты асырған. Артынша рөлді басқара алмай, қарсы қозғалыс жолағына шығып, Nexia Ravon автокөлігімен соқтығысқан. Ол көліктің тізгінінде 28 жастағы жүргізуші болды", - деді полиция өкілі.
Жол апатынан 5 адам қаза тауып, 1 адам жарақат алды.
"Оқиға орнында екі жүргізуші, үш жолаушы қаза болды. Toyota Camry-дің бір жолаушысы ауыр халде қалалық ауруханаға жатқызылды. Аталған факті бойынша Қылмыстық кодекстің 345-бабы 4-бөлігі (көлiкті басқаратын адамдардың жол жүрісі немесе көлiкті пайдалану қағидаларын бұзуы абайсызда екi немесе одан да көп адамның өлiмiне әкеп соққан жағдай) бойынша қылмыстық іс қозғалды", - деп толықтырды ведомство өкілі.
Полиция департаменті жүргізушілерден жол ережелерін қатаң сақтауды сұрайды.
1334 рет оқылды
