Коллаж: видеодан кадр/ gov.kz
Атырау облысында аудан әкімінің әйелі тұрмыстық зорлық-зомбылыққа ұшырағанын жеткізді, деп хабарлайды "Ұлт ақпарат" Kazinform-ға сілтеме жасап.
Әйелдің айтуынша, күйеуі оған бірнеше рет қол көтерген. Зәбір көрген әйелдің видеосы әлеуметтік желіде тарады.
«Бірге тұрған 11 жылдың ішінде балаларымыздың көзінше ұрды. Мәселен, 2021 жылы таңғы сағат 04:00-те мас күйде мені балалардың көзінше ұрып, бетіме жарақат салды. Осыдан кейін амалсыз жедел жәрдем мен полиция шақыруға мәжбүр болдым. Балаларымыз үшін шағымымды қайтып алуымды сұрады. Бұл жағдай 2023 жылғы 31 мамырда тағы қайталанды. Тағы да балалардың көзінше мені теуіп, ұрып-соқты. Мені мүгедек қыламын деп қорқытты. Омыртқам сынып, бір ай жүре алмай қалдым. Осы уақытта өзінің таныстарын пайдаланып, балаларымды тартып алды», - деді зәбір көрген әйел.
Атырау облыстық Полиция департаменті баспасөз қызметінің мәліметіне сүйенсек, аудан әкіміне қатысты қылмыстық іс ҚР Қылмыстық кодексінің 107-бабының 2-бөлігімен тергелген. Қылмыстық іс ақпан айында сотқа жіберілген.
Атырау облысы әкімінің баспасөз қызметінен мәлім еткендей, аудан әкімінің бұрынғы жұбайы әкімдікке жүгінбеген.
«Азаматша А.Үмбетқалиева Атырау облысының әкімдігіне жүгінбегенін хабарлаймыз. Туындаған мән-жайларға байланысты қызметтік тексеру тағайындалды», - деп хабарлады облыс әкімінің баспасөз қызметі.
Ал Атырау облыстық сотының баспасөз қызметі аудан әкіміне қатысты қылмыстық істің қаралып жатқанын растады.
«Қылмыстық іс Атырау қаласының №2 сотында қаралып жатыр. Келесі сот отырысы 29 мамырда сағат 10:00-де өтеді», - деп мәлім етті облыстық соттың баспасөз қызметінен.
33983 рет оқылды
