Лионель Месси "Барселонадан" кетті. Атақты футболшының кетуін клуб өкілдері хабарлады.
"Барселона" мен Лионель Месси келісімге келіп, бүгін жаңа келісімшартқа қол қоюға ниет білдірсе де, бұл қаржылық және құрылымдық кедергілерге байланысты мүмкін болмады (Испания лигасының ережелері). Месси "Барселонада" қалмайды. Екі жақ та ойыншы мен клубтың тілектері орындалмайтынына қатты өкінеді. "Барселона" ойыншыға клубтың дамуына қосқан үлесі үшін алғысын білдіреді және оған жеке және кәсіби өмірінде барлық жақсылықты тілейді", - делінген команданың сайтында жарияланған хабарламада.
Sports.ru басылымының мәліметінше, испан Ла Лигасында қатаң қаржы реттеуі бар: шығын көлемі клубтың табысына байланысты болуы керек, "Барселона" бұған сәйкес келе алмайды, сондықтан лига жаңа келісімшарттарды тіркей алмайды.
Сондай-ақ, 34 жастағы шабуылшының клубтан кетуіне "Барселонадағы" қаржы қиындығы да бір себеп болған. Коронавирус пандемиясы кезінде клуб табысы едәуір кеміген. Өткен маусымда "Барселона" футболшылар жалақысына 671 миллион евро жұмсаса, енді клуб 383 миллионға шектелуге мәжбүр.
Месси командада жылына 90 миллионнан астам евро алып келді. Былтыр ол жалақасы жоғары футболшылар тізімінде бірінші орында тұрды. Ақпаратқа қарағанда, аргентиналық футболшы "Барселонада" қалу үшін жалақыны екі есе азайтуға дайын болған, бірақ клуб оны да төлей алмай отыр.
Лионель Месси "Барселонаға" 2000 жылы 13 жасында келген. Төрт жылдан соң ол команданың негізгі құрамында ойнады. Месси "Барселона" сапында 767 ойын өткізіп, 661 гол соғып, 263 нәтижелі пас жасаған. Осы клубпен он мәрте Испания чемпионы атанып, жеті мәрте ел кубогын жеңіп алған және төрт рет УЕФА Чемпиондар Лигасын бағындырды. Ол "Алтын допты" алты мәрте алды.
1812 рет оқылды
