Lionel Messi "Barselonadan" ketti. Ataqty fýtbolshynyń ketýin klýb ókilderi habarlady.
"Barselona" men Lionel Messi kelisimge kelip, búgin jańa kelisimshartqa qol qoiýǵa niet bildirse de, bul qarjylyq jáne qurylymdyq kedergilerge bailanysty múmkin bolmady (Ispaniia ligasynyń erejeleri). Messi "Barselonada" qalmaidy. Eki jaq ta oiynshy men klýbtyń tilekteri oryndalmaitynyna qatty ókinedi. "Barselona" oiynshyǵa klýbtyń damýyna qosqan úlesi úshin alǵysyn bildiredi jáne oǵan jeke jáne kásibi ómirinde barlyq jaqsylyqty tileidi", - delingen komandanyń saitynda jariialanǵan habarlamada.
Sports.ru basylymynyń málimetinshe, ispan La Ligasynda qatań qarjy retteýi bar: shyǵyn kólemi klýbtyń tabysyna bailanysty bolýy kerek, "Barselona" buǵan sáikes kele almaidy, sondyqtan liga jańa kelisimsharttardy tirkei almaidy.
Sondai-aq, 34 jastaǵy shabýylshynyń klýbtan ketýine "Barselonadaǵy" qarjy qiyndyǵy da bir sebep bolǵan. Koronavirýs pandemiiasy kezinde klýb tabysy edáýir kemigen. Ótken maýsymda "Barselona" fýtbolshylar jalaqysyna 671 million evro jumsasa, endi klýb 383 millionǵa shektelýge májbúr.
Messi komandada jylyna 90 millionnan astam evro alyp keldi. Byltyr ol jalaqasy joǵary fýtbolshylar tiziminde birinshi orynda turdy. Aqparatqa qaraǵanda, argentinalyq fýtbolshy "Barselonada" qalý úshin jalaqyny eki ese azaitýǵa daiyn bolǵan, biraq klýb ony da tólei almai otyr.
Lionel Messi "Barselonaǵa" 2000 jyly 13 jasynda kelgen. Tórt jyldan soń ol komandanyń negizgi quramynda oinady. Messi "Barselona" sapynda 767 oiyn ótkizip, 661 gol soǵyp, 263 nátijeli pas jasaǵan. Osy klýbpen on márte Ispaniia chempiony atanyp, jeti márte el kýbogyn jeńip alǵan jáne tórt ret ÝEFA Chempiondar Ligasyn baǵyndyrdy. Ol "Altyn dopty" alty márte aldy.
