Qazaqstandyq jeńil atlet Iasmina Toqsanbaevaǵa bir bólmeli páterdiń kilti tabystaldy. Syilyqty Qazaqstan jeńil atletika federatsiiasy men demeýshiler usynǵan, dep habarlaidy ult.kz.
Federatsiia XX Jazǵy Aziia oiyndary men V Aziia paraoiyndarynda el namysyn qorǵaǵan sportshylar men jattyqtyrýshylardy marapattaý rásimin ótkizdi. Shara barysynda sporttyq júristen marafon qashyqtyǵynda óner kórsetken Iasmina Toqsanbaevaǵa páter berildi.
Sportshy áleýmettik jelidegi paraqshasynda qýanyshyn bólisip, qoldaý kórsetken azamattarǵa alǵys aitty.
«Ishimdegi qýanysh pen tolqynysty sózben aityp jetkizý múmkin emes! Óz elimniń jáne federatsiianyń osylai baǵalaǵanyna sheksiz qýanyshtymyn. Bul meni odan ári damyp, alǵa jyljýǵa jigerlendiredi», – dep jazdy ol.
Eske salaiyq, Aichi-Nagoiada ótken Aziia oiyndarynda Iasmina Toqsanbaeva sporttyq júristen marafondy 3 saǵat 22 minýt 20 sekýndta aiaqtap, márege birinshi bolyp kelgen edi. Alaida keiin sportshynyń nátijesi joiyldy. Buǵan jarysta paidalanǵan aiaq kiiminiń bekitilgen tizim talaptaryna sáikes kelmeýi sebep bolǵan.
Buǵan deiin Aqordada Memleket basshysy Aziia oiyndary men Aziia paraoiyndarynyń jeńimpazdary jáne júldegerlerin marapattaǵan bolatyn. Marapattaý rásiminen keiin Iasmina Toqsanbaeva Aziadadan keiingi ómiri týraly pikir bildirdi.
