Almatyda ózbek kinematografisteri túsirgen «Uly Ámir jáne Donna Mariia» tarihi kórkem filminiń kórsetilimi ótti. Týyndyda Ámir Temirdiń tutqyndaǵy majarstandyq hanshaiymdy azat etken oqiǵasy baiandalady, dep habarlaidy ult.kz.
Film Almaty qalasy ákimdiginiń qoldaýymen jáne Qazaqstan Jazýshylar odaǵynyń uiymdastyrýymen kórermenge usynyldy.
Týyndyda Ámir Temirdiń ómiri, bilik júrgizý kezeńi, memleket basqarýdaǵy ustanymdary men adamgershilik qasietteri kórinis tapqan. Siýjettiń negizgi jelisi – onyń tutqynda bolǵan majarstandyq hanzadanyń qyzy Mariiany bosatyp, eline qaitýyna múmkindik jasaýy.
Film kórsetilimine Ózbekstan Respýblikasy Prezidentiniń keńesshisi, stsenarii avtory Hairiddin Sultan men rejisser Jahanger Qasymov qatysty. Olar týyndynyń ideiasy, túsirilim barysy jáne tarihi oqiǵanyń máni týraly áńgimeledi.
Qazaqstan Jazýshylar odaǵynyń Basqarma tóraǵasy Mereke Qulkenov filmniń túrki halyqtarynyń tarihy men ortaq qundylyqtaryn tanytýdaǵy mańyzyn atap ótti.
«Bul kino ózbek halqynyń, tutas túrki halyqtarynyń múmkindikterin, olardyń tarihtaǵy ornyn jaqsy kórsete alǵan. Sonyń ishinde búgingi qoǵam úshin asa mańyzdy gýmanizm ideiasyn alǵa tartady. Filmniń negizgi ózegi de – adamgershilik pen izgilik», – dedi ol.
Al stsenarii avtory Hairiddin Sultannyń aitýynsha, tarihi derekterde Ámir Temirdiń Mariiany azat etip, eline qaitýyna múmkindik bergeni aitylady.
Sondai-aq onyń sózinshe, Donna Mariia keiingi urpaqtaryna Ámir Temirge degen alǵysyn jetkize almaǵanyn aityp, osy boryshty óteýdi ósiet etken.
Filmde osy oqiǵa arqyly azattyq, ádilettilik, izgilik pen adamdyq qadir-qasiet taqyryptary qozǵalady. Týyndy túrki halyqtarynyń rýhani sabaqtastyǵy men ortaq tarihi murasyn dáripteýdi maqsat etedi.
