Qazaqstannyń Halyq ártisi Maqpal Júnisova marqum jary Zamanbek Nurqadilovke qatty uqsaityn azamatty kezdestirip, áserimen bólisti, dep habarlaidy ult.kz.
Ánshi áleýmettik jelidegi paraqshasynda Aman esimdi azamatpen kezdeskenin aityp, onyń kelbeti marqum joldasyn eske túsirgenin jetkizdi. Óner iesi bul sáttiń ózin erekshe tolqytqanyn jasyrmady.
"Zákeńe uqsaityn Aman baýyrymmen kezdesip qaldym. Zákeńniń 50 jasy kózime elestep ketti", – dep jazdy ánshi.
Maqpal Júnisovanyń jazbasy oqyrmandaryn da beijai qaldyrmady. Kópshilik sýrettegi azamattyń Zamanbek Nurqadilovke uqsastyǵyna tańǵalyp, pikirlerin jarysa qaldyrǵan.
"Zákeńnen aýmaidy!", "Qany bar emes pe eken?", "Dál ózi, uqsaidy eken", "Aýmaidy eken", – dep jazdy jeli qoldanýshylary.
Keibir oqyrmandar ánshiniń marqum jaryna degen qurmetin erekshe atap ótip, oǵan jyly lebizderin arnaǵan.
"Maqpal sińilimiz Zamanbek aǵamyzdyń oshaǵynyń tútinin tútetip, mýzei qylyp saqtap otyr ǵoi. Qyzdaryńyzdyń qyzyǵyn kórińiz, baqytty bolyńyzdar!" – dep jazdy pikir bildirýshilerdiń biri.
Aita keteiik, Zamanbek Nurqadilov 2005 jyly ómirden ótken edi. Maqpal Júnisova buǵan deiin de marqum joldasyn saǵynyshpen eske alyp, onymen bailanysty estelikterin kópshilikpen bólisip júrgen.
Maqpal Júnisova kim?
Maqpal Muhamediiarqyzy Júnisova – qazaq estradasynyń kórnekti ókili, Qazaqstannyń halyq ártisi, Memlekettik syilyqtyń laýreaty. Ol 1964 jyly 11 qańtarda Qaraǵandy oblysynyń Terekti aýylynda dúniege kelgen.
Ahmet Jubanov atyndaǵy mýzykalyq mektep-internatta jáne Shymkent mádeniet institýtynda bilim alǵan. Óner jolyn "Gúlder" ansamblinde halyq ánderin oryndaýdan bastap, keiin "Qazaqkontsert" birlestiginde eńbek etti.
Onyń oryndaýyndaǵy "Ǵashyq júrek", "Qyz ǵumyr", "Fariza qyz", "Qoshtasý" ánderi tyńdarmanǵa keńinen tanyldy.
1994 jyly Qazaqstannyń halyq ártisi ataǵyn alyp, 1999 jyly Memlekettik syilyqtyń laýreaty atandy.
