Biri gastroldik saparda kóligi aýdarylyp, aýrýhanaǵa túsken. Endi biri túngi jolda apatqa ushyraǵan. Ult.kz jol apatynan aman qalyp, basynan ótkenin ózi baiandaǵan bes ánshi týraly derekterdi jinaqtady.
Ernar Aidar: «Ómirim úsh sekýndta ózgerip ketti»
Ernar Aidar 2017 jyldyń sáýirinde gastroldik sapar kezinde jol apatyna túsken. Ánshi «Jaqsy adamdarym» baǵdarlamasynda sol oqiǵanyń ómirine úlken ózgeris ákelgenin aitqan.
Óner iesi ata-anasyn alańdatpaý úshin apatty kópshilikke bildirmeýge tyrysqan. Alaida aýrýhanadaǵy jáne zaqymdanǵan kóliktiń sýretteri tarap, bolǵan jaǵdai jaqyndaryna da jetken.
“Bir Alla saqtady. Jol apatynda ómirim úsh sekýndta ózgerip ketti”, – degen ánshi.
Ernardyń aitýynsha, kólik aýdarylǵannan keiin jumysy toqtap, emdelýge májbúr bolǵan. Osy jaǵdai ony otbasyn qurý týraly shyndap oilandyrǵan. Keiin bolashaq jary Mádinamen tanysyp, shańyraq kótergen.
Qairat Nurtas: «Ómirdi baǵalai bastadym»
Qairat Nurtas ta kólik apatynan keiin ómirge degen kózqarasy ózgergenin jasyrmaǵan. Ánshiniń osy oqiǵa týraly sózi 2018 jyly jariialanǵan.
Ol apat sátinde búkil ómiri kóz aldynan ótkenin, qiyn kezde janynda qalǵan adamdardyń qadirin túsingenin jetkizgen.
“Aýrýxanada ómirge jańa kelgendei boldym, ómirdi baǵalai bastadym, jalǵyzdyqty sol kezde sezdim!” – degen Qairat Nurtas.
Ánshi basyna is túskende qoldaý kórsetkenderdiń sanaýly bolǵanyn aityp, kópshilikti otbasy men jaqyndaryn baǵalaýǵa shaqyrǵan.
Marjan Arapbaeva: «Astanaǵa zorǵa jettik»
Marjan Arapbaeva túngi jolda apatqa ushyraǵanyn áleýmettik jelidegi paraqshasynda habarlaǵan. Bul týraly aqparat 2025 jyldyń shildesinde jariialandy.
Ánshiniń aitýynsha, oqiǵa Astana baǵytyndaǵy tasjolda bolǵan. Óner iesi apattan aman qalyp, úiine jetkenine shúkirshilik etken.
“Bir qudai saqtady. Astanaǵa zorǵa jettik. Trassada jol apatyna ushyrap, aman qaldyq”, – dep jazǵan Marjan Arapbaeva.
Ol bolǵan jaǵdaidy abai bolýǵa shaqyrǵan belgi retinde qabyldap, ómirdiń qadirin burynǵydan da tereń sezingenin aitqan.
Móldir Áýelbekova: «Bárimiz amanbyz»
Móldir Áýelbekova jol apatyna túskeni týraly Instagram paraqshasynda jazǵan. Ánshiniń habarlamasy 2023 jylǵy tamyzda aqparat quraldarynda jariialanǵan.
Ol oqiǵanyń mán-jaiyn tolyq ashpaǵanymen, janyndaǵy adamdardyń aman ekenin jetkizip, jurtty jolda saq bolýǵa shaqyrǵan.
“Búgin jol apatyna ushyradyq. Soǵan qaramastan, jumysta kúlimsirep júrýge týra keledi. Allaǵa shúkir, bárimiz amanbyz. Jolda abai bolaiyq”, – degen ánshi.
Jazbasynan óner iesiniń oqys jaǵdaidan keiin de jumysyn jalǵastyrǵanyn ańǵarýǵa bolady.
Keńes Álimjan: «Qarama-qarsy kólikke soqtyǵyspadyq»
Keńes Álimjan 2025 jyldyń naýryzynda Tarazǵa bara jatqanda jol apatyna túsken. Keiin ánshi videoúndeý jariialap, jaǵdaiyn suraǵan tyńdarmandaryna alǵys aitqan.
Óner iesi joldan shyǵyp ketýin uiqysynyń qanbaýymen bailanystyrǵan.
“Ýaqytly uiyqtamaǵannyń kesirinen, joldan shyǵyp ketip, osyndai jol-kólik apaty boldy. Qaita qarama-qarsy kólikke soqtyǵyspadyq. Alla ózi saqtady”, – degen Keńes Álimjan.
Ánshi ózi úshin alańdaǵan jandarǵa aman ekenin jetkizip, búlingen kólikten adamnyń ómiri qymbat ekenin aitqan.
