Meirambek Bespaevtyń 50 jas mereitoiyna kelgen Qazaqstannyń halyq ártisi Nurǵali Núsipjanov “Sarjailaýym” ánin oryndady, dep habarlaidy ult.kz.

Merekelik keshte Janar Aijanova ónerdegi aǵa býyn ókiline qolqa salyp, án aitqyzǵan. Osylaisha mereitoiǵa jinalǵan qaýym Nurǵali Núsipjanovtyń oryndaýyndaǵy ándi tyńdady.

Aita keteiik, óner iesi buǵan deiin densaýlyǵyna bailanysty aýyr kezeńdi bastan ótkergenin aitqan edi. Biyl naýryzda júregine kúrdeli ota jasalǵanyn habarlap, ózine kómek kórsetken dárigerlerge alǵysyn bildirgen. Al qazan aiynda densaýlyǵyn qalpyna keltirý úshin ońaltý kýrsynan ótip júrgenin jazdy. 

Nurǵali Núsipjanov kim? 
 

Nurǵali Núsipjanov — qazaqtyń kórnekti ánshisi, Qazaqstannyń halyq ártisi, Memlekettik syilyqtyń laýreaty. Ol 1937 jyly 5 qańtarda burynǵy Taldyqorǵan oblysyna qarasty Dolanaly aýylynda dúniege kelgen. Qarapaiym shopan otbasynda ósip, jastaiynan ánge áýes bolǵan.

Óner iesi 1956 jyly Qurmanǵazy atyndaǵy konservatoriiaǵa oqýǵa túsken. Keiin Qazaq radiosy men televiziiasynda eńbek etip, mýzykalyq habarlardyń damýyna úles qosqan. 1976 jyly Qurmanǵazy atyndaǵy halyq aspaptary orkestrine jetekshi ánshi bolyp qabyldanǵan.

Nurǵali Núsipjanov Nurǵisa Tilendiev pen Shámshi Qaldaiaqovtyń birqatar ánderin alǵash oryndap, halyqqa tanytqan. Onyń repertýarynda “Qazdar qaitqanda”, “Ainashym”, “Muńaima”, “Aspan qyzy”, “Saǵynysh” sekildi shyǵarmalar bar. Ánshi ulttyq ánshilik dástúrdi jalǵastyryp, qazaq kompozitorlarynyń týyndylaryn keńinen nasihattaǵan ónerpaz retinde tanylǵan.

Ónerge sińirgen eńbegi úshin “Qurmet”, “Parasat” ordenderimen marapattalǵan. 2026 jyly 89 jasqa tolǵan ánshi — qazaq sahnasynyń qadirli aqsaqaldarynyń biri.