Ánshi Zattybek Kópbosynuly Meirambek Bespaevtan 15 million teńgege satyp alǵan dombyrasyn uly Bihanǵa syilady. Óner iesi qymbat aspapty qolǵa alyp, kúi shertken sátin áleýmettik jelide bólisti, dep habarlaidy ult.kz.

Ánshiniń aitýynsha, bul dombyrany alýynyń ózindik máni bar. Ol ulyna óner joly juǵysty bolyp, qazaqtyń ulylarynyń izin jalǵastyrsyn degen nietpen osyndai syi jasaǵan.

“Yrym degen bar. Qazaqtyń ulylarynyń izin jalǵasyn degen niette osy dombyrany aldym”, – dedi Zattybek Kópbosynuly.

Beinejazbada Bihan ákesi syilaǵan dombyramen “Erkem-ai” ánin oryndaǵan.

Alaida óner iesiniń syilyǵy jelide ártúrli pikir týǵyzdy. Birqatar oqyrman “Qutty bolsyn, aǵa” dep izgi tilegin bildirse, ózgeleri bir aspapqa osynsha qarajat jumsaýdy quptamaǵan.

“15 mln ysyrap emes pe? Ondai aqsha qaidan tabasyz, bir úidiń aqshasy ǵoi”, “15 millionǵa qaiǵyratyn kúi siiaqty ma?” – dep jazdy jeli qoldanýshylary.

Aita keteiik, Zattybek Meirambektiń mereitoiynda dombyrany 16 million teńgege satyp aldy. 

Zattybek Kópbosynuly kim?

Zattybek Kópbosynuly - qazaq estradasynyń ánshisi, sazger ári termeshi. Ol 1974 jyly qazirgi Túrkistan oblysy Báidibek aýdanynyń Keńes aýylynda dúniege kelgen. Halyqqa “Aqmarjan”, “Nemerem” sekildi ánderimen tanylǵan.

Óner jolyn 1995 jyly Báidibek aýdanyndaǵy “Shaldar” balalar saz mektebinde muǵalim bolyp bastaǵan. Keiin mádeniet úiinde kórkemdik jetekshi qyzmetin atqaryp, “Shanshar” teatrynda óner kórsetken. Shymkenttegi mektepterde mýzykadan jáne dombyradan sabaq bergen. 

Zattybek — respýblikalyq “Shalqar” termeshiler baiqaýynyń laýreaty. Shyǵarmashylyǵynda estradalyq ándermen qatar ulttyq oryndaýshylyq dástúrge de oryn beredi. Dombyramen án aityp, terme oryndaidy. 

Ánshiniń Aizere esimdi qyzy men Bihan esimdi uly bar. Ol suhbattarynda balalaryna jumsaq qaraitynyn, qoly bosaǵanda olarmen birge ýaqyt ótkizýge tyrysatynyn aitqan.