Aqtóbe oblysynda 2011 jyldan beri toqtap turǵan jergilikti áýe qatynasyn qaita iske qosý josparlanyp otyr. Alǵashqy kezeńde Shalqar qalasynyń mańyndaǵy qaraýsyz qalǵan aerodrom jóndeledi. Bul týraly oblys ákimdigi málimdedi, dep habarlaidy ult.kz.
Aerodrom Shalqar qalasynan shamamen 7 shaqyrym jerde ornalasqan. Jóndeý jumystarynan keiin munda 19 jolaýshyǵa deiin tasymaldaityn shaǵyn ushaqtar qabyldanady dep josparlanyp otyr.
Jobany júzege asyratyn merdiger retinde «SK Best Spec Stroy KZ» JShS tańdalǵan. Aldyn ala jospar boiynsha, jobalaý jumystaryna bes ai, qurylys-montaj jumystaryna taǵy alty ai qajet. Bul merzimge memlekettik saraptamadan ótý ýaqyty kirmeidi.
Joba aiasynda uzyndyǵy 1200 metr bolatyn ushý-qoný jolaǵy nyǵaitylyp, perron men ushý-qoný joly jańartylady. Sondai-aq qorshaý ornatylyp, jolaýshylarǵa arnalǵan modýldik pavilon salynady.
Qandai ushaqtar qatynaidy?
Aerodromdy syiymdylyǵy 19 adamǵa deiingi L-410 ushaqtaryn qabyldaýǵa beiimdeý kózdelgen. Áýe reisteri tek kúndizgi ýaqytta oryndalady.
Áýe tasymalyn «Áliia Moldaǵulova atyndaǵy halyqaralyq áýejai» AQ bazasynda uiymdastyrý josparlanyp otyr. Ushaqtardy Ónerkásipti damytý qory arqyly qarjylyq lizingke satyp alý kózdelgen.
Alaida reisterdi bastaý úshin aerodromdy jóndeý jetkiliksiz. Nysan mindetti sertifikattaýdan ótýi, áýe kemeleri satyp alynýy jáne qajetti ruqsattar alynýy kerek.
Reister qashan bastalady?
Oblys ákimdigi ázirge jolaýshylar reisteriniń naqty qashan bastalatynyn jariialaǵan joq. Sondai-aq ushaqtardyń qai baǵyttarǵa qatynaityny, bilet quny men reisterdiń jiiligi ázirge belgisiz.
Aita keteiik, Aqtóbe oblysyndaǵy jergilikti áýe jelileri boiynsha turaqty jolaýshylar tasymaly 2011 jyly toqtaǵan. Endi óńir biligi shaǵyn aviatsiiany damytý arqyly eldi mekenderdiń kólik qatynasyn jaqsartýdy kózdep otyr.
