Reseilik reper Navai (Navai Bakirov) Qazaqstannan shyǵarylǵannan keiin Máskeýde alǵash ret kontsert berdi. Óner iesi jýrnalisterdiń Qazaqstanda ustalýyna qatysty suraqtaryna jaýap berýden bas tartty, dep habarlaidy ult.kz.
SHOT Telegram-arnasynyń málimetinshe, 8 qarashada Máskeýdegi klýbtardyń birinde reperdiń Qazaqstannan shyǵarylǵannan keiingi alǵashqy kontserti ótken.
Kontsert aiaqtalǵan soń, túngi saǵat 01:00 shamasynda Navai klýbtan VIP-kireberis arqyly shyqqan. Ony jankúierleri men jýrnalister kútip turǵan. Reper birneshe jankúierimen sýretke túskenimen, Qazaqstanda ustalýyna qatysty suraqtarǵa jaýap bermegen.
Osydan keiin kúzetshiler jýrnalisterdiń mýzykantqa jaqyndaýyna kedergi jasap, ol sport kóligine otyryp, ketip qalǵan.
Navai Qazaqstanda ne úshin ustaldy?
Eske salaiyq, 14 qazanda reperdiń Astanada ótetin kontserti bolmaityny belgili boldy. Sol kúni Jambyl oblysynyń politsiia departamenti Navai-diń esirtki kontrabandasyna kúdikpen ustalǵanyn habarlady. Osy derek boiynsha qylmystyq is qozǵalyp, ol ýaqytsha ustaý izoliatoryna qamalǵan.
15 qazanda oǵan qatysty qamaýǵa alý túrindegi bultartpaý sharasy sanktsiialandy.
Al 20 qazanda reperge qatysty is aqtamaityn negizder boiynsha toqtatylǵany jáne onyń Qazaqstannan májbúrli túrde shyǵarylǵany belgili boldy.
