Sanjar Boqaevqa qatysty qylmystyq is boiynsha ótip jatqan sot otyrysynda istiń negizgi aiyptalýshylarynyń biri jaýap berip, granit taqtalarǵa qatysty qoǵamda úlken shý týǵyzǵan beineroliktiń qalai túsirilgenin egjei-tegjeili baiandady, dep habarlaidy ult.kz.
Eske sala keteiik, qylmystyq istiń bir epizody 2025 jyldyń kúzinde Úlken Almaty ózeniniń arnasyn qaita jańǵyrtý kezinde qurylys materialdarynyń urlanýyna qatysty. Memlekettik aiyptaý tarapynyń nusqasy boiynsha, Boqaev granit taqtalardyń urlanýyn ózi uiymdastyryp, ony beinejazbaǵa túsirý arqyly ákimdikti aiyptaityn, qarjy jymqyrýdy «áshkerelegen» atyshýly material jariialaýdy kózdegen.
Ulan Núsipqoja bul iste jai ǵana kýáger emes, Boqaevtyń jeke beineoperatory bolyp jumys istegen sottalýshylardyń biri. Sotta jaýap alý barysynda Núsipqojanyń Boqaevpen 2021 jyldan 2023 jylǵa deiin jumys istegeni belgili boldy. Bastapqyda ol qosymsha tabys tabý maqsatynda 20 myń teńgege beinerolikter montajdap júrgen. Keiin «Nur Otan» partiiasynyń burynǵy ideology operatordan negizgi jumys oryndarynan shyǵyp, tolyqtai ózine jumys isteýge kóndirgen.
Tipti árqaisysynyń óz róli de bolǵan: operator tek beine túsirip, montajdaýmen ainalysqan jáne daiyn materialdardy WhatsApp arqyly jiberip otyrǵan. Al beinerolikterdi TikTok, Instagram jáne YouTube jelilerine Boqaevtyń ózi jariialaǵan.
Granit taqtalardyń urlanýyn qoldan uiymdastyrý ideiasy Boqaevtyń oiyna áleýmettik jeliden ózge bireýdiń beinejazbasyn kórgennen keiin kelgen. Kezdeisoq túsirilim jasaǵan kofe satýshy qurylys materialdarynyń kólikke tielip jatqan sátin telefonyna jazyp alǵan eken. «QazTransGaz» basshysynyń burynǵy keńesshisi osy beinejazbany operatoryna kórsetip, dál osyndai «áshkereleýshi material» túsirýdi talap etken.
Núsipqoja bastapqyda kelisimshart talaptaryn alǵa tartyp, túnniń bir ýaǵynda túsirilimge barýdan bas tartqan. Alaida Boqaev oǵan «alǵan jalaqyńdy aqtaýyń kerek» dep jaýap bergen.
Sotta Núsipqoja 10 qyrkúiekte belgisiz adamdardyń granit taqtalardy urlap jatqanyn kórsetýge baǵyttalǵan alǵashqy sátsiz túsirilimniń qalai ótkenin búge-shigesine deiin aityp berdi.
«Keshki ýaqytta, saǵat 21:00-22:00 shamasynda túsirý kerek boldy. Meniń mindetim – bolǵan jaǵdaidyń bárin tolyqtai beinejazbaǵa túsirý edi», – dedi operator.
Osy «tergeý jumysyn» úilestirý úshin Boqaev operatordy arnaiy jaldanǵan oryndaýshy Aqylbek Hamrakýlovpen bailanystyrǵan. Qylmystyq is materialdaryna sáikes, granit taqtalardy manipýliator kóligimen tasyp áketýdi dál osy adam uiymdastyrǵan.
Núsipqojanyń aitýynsha, Boqaev jumysynyń kóptigin syltaý etip, jumysshymen tikelei bailanysýdan qashqaqtaǵan. Barlyq tapsyrmany tek operator arqyly jetkizip otyrǵan.
«Boqaev maǵan Aqylbektiń nómirin berdi. Ol – Boqaevtyń úiiniń shatyryn jóndep júrgen jumysshy. «Onymen habarlas, sol jerde bolady» dedi. Biraq ol telefondy kótermei, qońyraýlarymdy qaita-qaita úzip tastady. Tek geolokatsiiasyn jiberdi», – dep túsindirdi Núsipqoja sotta.
Oqiǵa ornyna jetken Núsipqoja jaqyn barýǵa júreksingen.
«Taqtalardyń kólikke tielip jatqanyn alystan túsire bastadym. Keiin júk tielgen soń kóliktiń sońynan erdim. Biraq taqtalardyń túsirilýin tolyq túsire almadym», – dedi ol.
Onyń ústine, Aqylbek qurylys materialdaryn josparlanǵan jerge emes, jeke turǵyn úiler ornalasqan aýmaqtaǵy bos alańǵa túsirip ketken.
Núsipqojanyń aitýynsha, túsirilgen beinejazbany kórgen Boqaev ashýǵa býlyqqan. Ol sátsiz tańdalǵan kereksiz túsirilim jaittary úshin Núsipqojany, al granit taqtalardy jerleý qyzmetterin kórsetetin sheberhananyń janyna emes, aidaladaǵy bos jerge túsirgeni úshin Aqylbekti beiádep sózdermen balaǵattaǵan. Boqaevtyń jospary boiynsha, áleýmettik jelilerde memleketke tiesili granit taqtalar qulpytas jasaityn sheberhanaǵa ótkizilip jatqandai kórinis qalyptastyrý qajet bolǵan. Boqaev «aqsha bosqa jumsaldy» dep ashýlanyp, operatordy óziniń ashý-yzaǵa toly aýdiohabarlamalaryn jumysshy Hamrakýlovqa jiberýge májbúrlegen. Sonymen qatar Núsipqojany sabyrǵa shaqyrý úshin bolyp jatqan árekettiń urlyq emes, bar bolǵany «urlanǵan zattardy satyp alý» ekenin aityp, ony sendirýge tyrysqan.
Boqaevtyń oiynsha, áleýmettik jelilerde memlekettik menshikke tiesili granit taqtalar qulpytas jasaityn kásiporynǵa ótkizilip jatqandai kórinis qalyptastyrý qajet bolǵan.
Kelesi kúni qajetti beinejazbany túsirý áreketteri jalǵasqan. Boqaev operatordy granit taqtalar túsirilgen jerge ózi aparyp, jolai jerleý qyzmetterin kórsetetin qolaily mekemeni taýyp alǵan. Sodan keiin Núsipqojaǵa sol jerdi beinejazbaǵa túsirýdi tapsyrǵan. Maqsat – noýtbýk arqyly granit taqtalardyń shyn máninde kólikke tielgen sátin olardyń basqa jerde túsirilgen jalǵan túsirý kórinisimen biriktirip, birtutas beinerolik jasaý.
Alaida montajdalǵan beinejazba shynaiy kórinbegen. Osydan keiin Boqaev granit taqtalardy taǵy bir márte urlaýdy uiymdastyryp, bárin basynan qaita túsirýdi tapsyrǵan.
15 qyrkúiekte bolǵan oqiǵalarǵa Boqaevtyń ózi tikelei qatysqan. Ol operatorymen birge jeke Toyota Land Cruiser 300 avtokóligimen Úlken Almaty ózeniniń boiyna kelgen.
Bul joly manipýliatordyń 12 granit taqtany kólikke tieý protsesi Boqaevtyń túsiniktemelerimen qatar túsirilgen. Ol aldyn ala daiyndap qoiǵan mátinin aityp, kórermenge jergilikti turǵyndardyń shaǵymy boiynsha oqiǵa ornyna jańa ǵana jetkendei áser qaldyrýǵa tyrysqan.
Besaǵash aýylyndaǵy jerleý qyzmetterin kórsetetin mekemeniń janynda taqtalardy kólikten túsirý kórinisi de tikelei túsirilgen.
Núsipqojanyń aitýynsha, Boqaevtyń kóligi manipýliatorǵa jaqyndaǵan kezde jumysshy Aqylbek belgisiz baǵytqa asyǵys qashyp ketken. Óitkeni ol túsirilim júrgiziletinin aldyn ala bilgen jáne beinekadrǵa túspeýi kerek bolǵan.
Núsipqojanyń sózinshe, Boqaev granit taqtalardyń «urlanýyna» qatysty óziniń ashý-yzasyn kamera aldynda bildirip bolǵan soń, manipýliator júrgizýshisine taqtalardy qaita tiep, ózen jaǵasyndaǵy burynǵy ornyna aparyp qoiýdy birden buiyrǵan.
Montajdalǵan beinerolik 2025 jylǵy 17 qyrkúiekte áleýmettik jelide jariialanyp, 1,5 millionnan astam qaralym jinady.
