Jambyl oblysynda Memleket basshysynyń Joldaýynda belgilengen mindetterdi túsindirý maqsatynda aqparattyq top músheleri Taraz qalasy, Baizaq jáne Jambyl aýdandarynda birqatar kezdesýler ótkizdi. Kezdesýlerge jergilikti turǵyndar, jastar, agroónerkásip kesheni men bilim salasynyń ókilderi, etnomádeni birlestikterdiń jetekshileri jáne eńbek ujymdary qatysty.
Aqparattyq top eki baǵyt boiynsha jumys istedi. Onyń quramynda Quryltai depýtaty Ábilhaiyr Tamabek, Qazaqstan Halyq keńesiniń múshesi Ýalihan Bolatbek, salalyq vitse-ministrler jáne Ulttyq ekonomika ministrliginiń Arnaiy baǵdarlamalar komitetiniń tóraǵasy boldy.
Kezdesýler barysynda Joldaýdyń negizgi basymdyqtary túsindirilip, óńirdiń ózekti máseleleri talqylandy. Atap aitqanda, aýyl sharýashylyǵyn damytý, sý resýrstaryn tiimdi paidalaný, irrigatsiialyq júielerdi jańǵyrtý, óndiristi órkendetý, sharýalardy qoldaý jáne aýyldyq jerlerdegi kásipkerlikti damytý máselelerine basymdyq berildi. Sonymen qatar turǵyndar áleýmettik jáne infraqurylymdyq máseleler boiynsha óz usynys-pikirlerin ortaǵa saldy.
Agroónerkásip kesheni ókilderimen kezdesýde Quryltai depýtaty Ábilhaiyr Tamabek Jambyl oblysy úshin sý resýrstaryn tiimdi paidalaný máselesiniń mańyzdylyǵyna toqtaldy. Onyń aitýynsha, óńirde halyq pen sharýashylyq nysandarynyń edáýir bóligi jer asty sýyn paidalanady. Alaida sý qory sheksiz emes. Sondyqtan ony utymdy paidalaný men saqtaý – búgingi kúnniń mańyzdy mindetteriniń biri ekenin atap ótti.
Depýtat Memleket basshysynyń Joldaýynda Sý resýrstarynyń ulttyq aqparattyq júiesin qurý jumystaryn jedel aiaqtaý tapsyrylǵanyn atap ótti. Bul júie sý kólemin naqty esepke alýǵa, ony tiimdi basqarýǵa jáne sý taratý jelilerindegi shyǵyndardy azaitýǵa múmkindik beredi.
Jalpy, kezdesýler ashyq pikir almasý formatynda ótip, turǵyndar ózderin tolǵandyrǵan suraqtaryn qoiyp, usynystaryn jetkizdi. Aqparattyq top músheleri Joldaýda belgilengen mindetterdi júzege asyrý naqty nátijelerge baǵyttalýy kerektigin atap ótti. Sondai-aq óńirdiń damýyna qatysty máselelerdi sheshýde memlekettik organdar men qoǵam arasyndaǵy ózara bailanystyń mańyzdylyǵyna nazar aýdardy.
