Tanymal aktrisa ári bloger Mereke Qalbaeva kelin bolyp túsken alǵashqy jyldary enesimen til tabysý ońai bolmaǵanyn aitty. Tipti enesi ulyn qyzǵanyp, psihologtyń kómegine júgingen, dep habarlaidy ult.kz.
Óner iesi "Ne deidi?" baǵdarlamasynda otbasylyq ómiriniń kópshilik bile bermeitin tustaryn áńgimeledi. Onyń aitýynsha, Arsen Akievpen shańyraq kótergennen keiin enesi ekeýiniń arasynda túsinispeýshilikter jii bolǵan.
Mereke jańa otbasyna birden sińisip kete almaǵanyn jasyrmady. Alǵashqy kezde enesi de ony jatyrqap, aralarynda salqyndyq bolǵan. Tipti bir-birimen jyly amandasýdyń ózi qiynǵa soqqan kórinedi.
"Basynda túsinispeýshilikter óte kóp boldy. Biraq shynyn aitý kerek, enemdi birden jaqsy kórip ketken joqpyn, enem de meni qabyldaǵan joq. Alǵashqy kezderi tipti bet súiisip amandaspaityn edik. Men súiip amandasýǵa tyryssam da, enem qashqaqtaityn", – dedi aktrisa.
Suhbat barysynda Mereke enesiniń mundai áreketiniń sebebine de toqtaldy. Onyń sózinshe, Arsenniń anasy ulyna erekshe baýyr basqandyqtan, onyń úilenip, bólek otbasy qurǵanyn qabyldaýǵa qinalǵan. Tipti balasyna degen qyzǵanysh sezimin jeńý úshin arnaiy mamanǵa qaralǵan.
"Enem Arsen ekeýimiz úilengen kezde qyzǵanǵany sonshalyq, balasyn bosatý úshin psihologqa barǵan. Eki uly bar. Arsendi qatty jaqsy kórgen ǵoi. Ony birden bosata almaǵan, júregi aýyrǵan", – dep túsindirdi óner iesi.
Degenmen ýaqyt óte kele ene men kelinniń arasyndaǵy qarym-qatynas jaqsarǵan. Bir kezderi bir-birin qabyldai almaǵan eki áiel búginde jaqyn adamdarǵa ainalǵan.
"Ekeýmiz qazir qurby sekildi bolyp kettik", – dedi Mereke Qalbaeva.
Aktrisanyń aitýynsha, alǵashqy kezdegi túsinispeýshilikterdiń ornyn qazir ózara syilastyq pen jaqyndyq basqan.
Aita keteiik, Mereke Qalbaeva men Arsen Akiev 2018 jyly otbasyn qurǵan. Ekeýi de kópshilikke "Jaidarman" sahnasy arqyly tanyldy. Erli-zaiyptylardyń jas aiyrmashylyǵy – alty jas. Qazir olar úsh balany tárbielep otyr.
