تانىمال اكتريسا ەرٸ بلوگەر مەرەكە قالباەۆا كەلٸن بولىپ تٷسكەن العاشقى جىلدارى ەنەسٸمەن تٸل تابىسۋ وڭاي بولماعانىن ايتتى. تٸپتٸ ەنەسٸ ۇلىن قىزعانىپ, پسيحولوگتىڭ كٶمەگٸنە جٷگٸنگەن, دەپ حابارلايدى ult.kz.
ٶنەر يەسٸ "نە دەيدٸ?" باعدارلاماسىندا وتباسىلىق ٶمٸرٸنٸڭ كٶپشٸلٸك بٸلە بەرمەيتٸن تۇستارىن ەڭگٸمەلەدٸ. ونىڭ ايتۋىنشا, ارسەن اكيەۆپەن شاڭىراق كٶتەرگەننەن كەيٸن ەنەسٸ ەكەۋٸنٸڭ اراسىندا تٷسٸنٸسپەۋشٸلٸكتەر جيٸ بولعان.
مەرەكە جاڭا وتباسىنا بٸردەن سٸڭٸسٸپ كەتە الماعانىن جاسىرمادى. العاشقى كەزدە ەنەسٸ دە ونى جاتىرقاپ, ارالارىندا سالقىندىق بولعان. تٸپتٸ بٸر-بٸرٸمەن جىلى امانداسۋدىڭ ٶزٸ قيىنعا سوققان كٶرٸنەدٸ.
"باسىندا تٷسٸنٸسپەۋشٸلٸكتەر ٶتە كٶپ بولدى. بٸراق شىنىن ايتۋ كەرەك, ەنەمدٸ بٸردەن جاقسى كٶرٸپ كەتكەن جوقپىن, ەنەم دە مەنٸ قابىلداعان جوق. العاشقى كەزدەرٸ تٸپتٸ بەت سٷيٸسٸپ امانداسپايتىن ەدٸك. مەن سٷيٸپ امانداسۋعا تىرىسسام دا, ەنەم قاشقاقتايتىن", – دەدٸ اكتريسا.
سۇحبات بارىسىندا مەرەكە ەنەسٸنٸڭ مۇنداي ەرەكەتٸنٸڭ سەبەبٸنە دە توقتالدى. ونىڭ سٶزٸنشە, ارسەننٸڭ اناسى ۇلىنا ەرەكشە باۋىر باسقاندىقتان, ونىڭ ٷيلەنٸپ, بٶلەك وتباسى قۇرعانىن قابىلداۋعا قينالعان. تٸپتٸ بالاسىنا دەگەن قىزعانىش سەزٸمٸن جەڭۋ ٷشٸن ارنايى مامانعا قارالعان.
"ەنەم ارسەن ەكەۋٸمٸز ٷيلەنگەن كەزدە قىزعانعانى سونشالىق, بالاسىن بوساتۋ ٷشٸن پسيحولوگقا بارعان. ەكٸ ۇلى بار. ارسەندٸ قاتتى جاقسى كٶرگەن عوي. ونى بٸردەن بوساتا الماعان, جٷرەگٸ اۋىرعان", – دەپ تٷسٸندٸردٸ ٶنەر يەسٸ.
دەگەنمەن ۋاقىت ٶتە كەلە ەنە مەن كەلٸننٸڭ اراسىنداعى قارىم-قاتىناس جاقسارعان. بٸر كەزدەرٸ بٸر-بٸرٸن قابىلداي الماعان ەكٸ ەيەل بٷگٸندە جاقىن ادامدارعا اينالعان.
"ەكەۋمٸز قازٸر قۇربى سەكٸلدٸ بولىپ كەتتٸك", – دەدٸ مەرەكە قالباەۆا.
اكتريسانىڭ ايتۋىنشا, العاشقى كەزدەگٸ تٷسٸنٸسپەۋشٸلٸكتەردٸڭ ورنىن قازٸر ٶزارا سىيلاستىق پەن جاقىندىق باسقان.
ايتا كەتەيٸك, مەرەكە قالباەۆا مەن ارسەن اكيەۆ 2018 جىلى وتباسىن قۇرعان. ەكەۋٸ دە كٶپشٸلٸككە "جايدارمان" ساحناسى ارقىلى تانىلدى. ەرلٸ-زايىپتىلاردىڭ جاس ايىرماشىلىعى – التى جاس. قازٸر ولار ٷش بالانى تەربيەلەپ وتىر.
