Pavlodarlyq «Ertis» fýtbol klýby resmi túrde kommertsiialyq basqarý modeline kóshti. Klýbty damytýǵa úsh jeke investor qatysady. Olarmen yntymaqtastyq týraly memorandýmǵa qol qoiyldy, dep habarlaidy ult.kz.
Jańa investorlar quramyna úsh uiym endi. Atap aitqanda, «Pavlodar ózen porty» AQ klýbtyń 50 paiyz úlesine, «RR-CAPITAL» JShS men «Birikken jemis-kókónis kompaniiasy» JShS 25 paiyzdan úleske ie boldy.
Klýbty kommertsiialandyrý Qazaqstan Prezidentiniń kásibi fýtbol komandalaryna jeke investitsiia tartý jónindegi tapsyrmasy aiasynda júzege asyryldy. Reformanyń maqsaty – basqarý tiimdiligin arttyrý jáne klýbtyń qarjylyq turaqtylyǵyn qamtamasyz etý.
Investorlar jyl saiyn keminde 1,5 mlrd teńge bóledi
Investorlar «Ertisti» qarjylandyrý, infraqurylymdy, negizgi jáne jastar komandalaryn damytý boiynsha uzaq merzimdi mindettemeler alady. Jyl saiynǵy investitsiia kólemi keminde 1,5 mlrd teńge bolady.
«Pavlodar ózen porty» AQ 2026 jyly klýbty qoldaýǵa demeýshilik kómek retinde 250 mln teńge bólgen. Jyl sońyna deiin taǵy 250 mln teńge baǵyttaýdy josparlap otyr.
Sonymen qatar memleket balalar jáne áielder fýtbolyn damytýǵa qoldaý kórsetýdi jalǵastyrady.
«Ertis» bankrottyqtan keiin qaita oraldy
Klýb úshin kommertsiialyq basqarý modeline kóshý birneshe kúrdeli jyldan keiingi jańa kezeń bolmaq. 2020 jyly qarjylyq qiyndyqtarǵa bailanysty «Ertis» jarystarǵa qatysýyn toqtatty. Al 2022 jyldyń qyrkúieginde bankrot dep tanyldy. Klýbty qaita jandandyrý jumystary 2023 jyly bastaldy.
2024 jyly komanda Ekinshi ligada óner kórsetip, kásibi fýtbolǵa qaita oraldy. Óz konferentsiiasynda 22 oiynnyń 18-inde jeńiske jetip, 56 upai jinady. Qarsylastar qaqpasyna 70 gol soqty.
Kelesi maýsymda Birinshi ligada ekinshi oryn alyp, Premer-ligaǵa joldama jeńip aldy. Osylaisha, eki jyldyń ishinde joǵary divizionǵa qaita oraldy.
Jańa stadion men fýtbol akademiiasy salynady
Klýbtyń kommertsiialyq modeline kóshýine bailanysty óńirde fýtbol infraqurylymyn damytý josparlanyp otyr.
2028 jyly Pavlodarda 25 myń kórermenge arnalǵan zamanaýi stadion salý kózdelgen. Al kelesi jyldan bastap memlekettik-jekeshelik áriptestik aiasynda 200 jas sportshyǵa arnalǵan fýtbol akademiiasyn ashý josparlanyp otyr.
Aita keteiik, «Ertis» óz tarihynda bes ret Qazaqstan chempiony atanǵan. Komanda 1993, 1997, 1999, 2002 jáne 2003 jyldary el birinshiliginde top jarǵan. Klýbtyń Premer-ligaǵa qaita oralýy onyń 60 jyldyq mereitoiymen tuspa-tus keldi.
