Qazaqstandyq ánshi Dimash Qudaibergenniń Meksikadaǵy jankúierleri óner iesine tosynsyi jasap, onyń alyp portretin qala qabyrǵasyna saldyrdy. Erekshe týyndy Monterrei qalasynda paida boldy, dep habarlaidy ult.kz.
Ánshiniń shyǵarmashylyǵyn joǵary baǵalaityn jankúierler bul bastama arqyly Dimashqa degen qurmeti men yqylasyn bildirgisi kelgen.
Jobany Dimash&DearsRegiasMty fan-klýby Meksikadaǵy Dears por Dimash aliansynyń qoldaýymen júzege asyrǵan. Al qabyrǵadaǵy aýqymdy sýretti Antonio Art Mural esimimen tanylǵan sýretshi Antonio salǵan. Dimashtyń portreti Monterrei qalasynyń ortalyǵyndaǵy Francisco Javier Mina 1140, Centro mekenjaiynda ornalasqan. Endi qala turǵyndary men týrister qazaqstandyq ánshige arnalǵan erekshe óner týyndysyn óz kózderimen kóre alady.
Jankúierlerdiń aitýynsha, bul sýret ánshige degen súiispenshiliktiń ǵana emes, Qazaqstan men Meksika arasyndaǵy mádeni bailanystyń da kórinisi.
"Bizdiń oiymyzsha, bul kórkem týyndy jai ǵana vizýaldy arnaýdan áldeqaida mańyzdy. Ol — meksikalyq jankúierlerdiń, ásirese Monterreidegi Dears qaýymdastyǵynyń shynaiy súiispenshiligi men qurmetiniń kórinisi. Biz Dimash pen onyń Otany — Qazaqstan arqyly qalyptasqan óner jáne mádeni bailanysymyzdy aishyqtaǵymyz keledi", – dedi Dears por Dimash aliansynyń ókilderi.
Aita keteiik, bul syilyq ánshiniń Meksikadaǵy kontserti qarsańynda jasalyp otyr. Dimash Qudaibergen 14 qarashada DIMENSIONS álemdik týry aiasynda Monterrei qalasynda óner kórsetedi.
Jankúierler qabyrǵadaǵy portret eki eldiń dostyǵyn nyǵaityp, qazaqstandyq ánshiniń shyǵarmashylyǵyn Meksika jurtshylyǵyna keńinen tanytýǵa yqpal etedi dep senedi.
