Алматы қаласы Алатау ауданы әкімдігінің күзетшісі «Хабар 24» телеарнасының журналисін күштеп көтеріп, әкімдік ғимаратынан шығарып жіберді. Бұл жайтқа байланысты әкімдік өкілдері түсінік берді. Сондай-ақ тілшінің өзі де әлеуметтік желілерде жазба қалдырып, видео және суреттермен бөлісті, деп хабарлайды ҚазАқпарат.
Кадрлардан күзетші журналист қызды лифтке жібермей тұрғанын көруге болады. Журналист әлі де ішке кіруге тырысқанда, ер адам ұстап алып, көтеріп, сыртқа шығарады. Телеарна қызметкерінің айғайы мен қарсылығына назар аудармай, күзетші оны көшеге итеріп, есікті жауып алады.
Кейінірек журналист денесі көгеріп, жарақат алғанын айтып, Instagram желісінде сурет жариялаған. Ол полицияға арыз түсіргенін мәлімдеді.
Кейінірек журналист денесі көгеріп, жарақат алғанын айтып, Instagram желісінде сурет жариялаған. Ол полицияға арыз түсіргенін мәлімдеді.
© instagram.com/akbope_tanirbergen
«Сен – әкімдік пен халық арасындағы көпірсің» дедіңіздер. Мен желпілдеп, жетіп бардым. Әкімдік болса, сіздердің «көпірлеріңізді» далаға лақтырып жіберді. Бітті. Алматы қаласы Алатау ауданындағы әкімдіктен мәңгі естелік», – деп жазды Ақбөпе Тәңірберген Instagram-дағы парақшасында.
Алматы қаласы Алатау ауданы әкімдігі жағдайға қатысты түсінік берді.
«Хабар 24» телеарнасының журналисі А.Тәңірбергенмен болған оқиғаға байланысты Алатау ауданының әкімдігі келесіні хабарлайды. Қолданыстағы карантин шектеулеріне байланысты Алатау ауданы әкімдігінің ғимаратына кіру шектелген және Ashyq қосымшасы бойынша жүзеге асырылады. Журналист А.Тәңірберген оператормен бірге ғимаратқа қосымшадағы өз мәртебесін сканерлемей, турникеттің астымен өткен, бұл туралы тиісті бейнежазба бар», - деп атап өтті әкімдіктегілер.
Әкімдіктегілердің сөзінше, БАҚ өкілдері күзет қызметі қызметкерлерінің ескертуіне жауап бермей, жанжалды шығарған. Алайда күзетші де жазалануы мүмкін.
«Алатау ауданының әкімдігі күзет қызметі қызметкерінің әрекетін қолайсыз екенін ресми түрде мәлімдейді. Бұл әрекеттері үшін қызметтік тергеу жұмыстары жүргізіліп жатыр. Нәтижесі бойынша оларды жауапқа тарту мәселесі қарастырылады. Сонымен қатар, әкімдік БАҚ өкілдерімен конструктивті негізде жұмыс істеу үшін ашық және өз құзыреті шеңберінде қызығушылық танытқан ақпаратқа қол жеткізуге дайын екенін атап өтеді. Аудан әкімі журналистерге сұхбат беруге дайын», - деп хабарлады Алматы қаласы Алатау ауданының әкімдігі.
Ал "Хабар 24" бас директоры Алена Горбачева телеарна атынан арыз жазылатынын мәлімдеп, фб-да жазба жариялады.
"Арна журналист Ақбөпе Тәңірбергеннің заңды кәсіби қызметіне кедергі келтіру фактісі бойынша полицияға арыз дайындайды", - деп жазды Горбачева.
Кейінірек ақпарат және қоғамдық даму министрі Аида Балаева да оқиғаға қатысты пікір білдірді.
"Өздеріңізге мәлім, Алматы қаласы, Алатау ауданы әкімдігі қызметкерінің журналист Ақбөпе Тәңірбергенге күш қолданған теріс әрекеті интернет желісінде қызу талқыланып жатыр. Аудандық әкімдіктің жауапты тұлғаларының бұған қатысты еш шара қолданбауы мәселені тіпті де ушықтырып отыр. Бұл әрине өте өкінішті және біздің бүгінгі "еститін мемлекет", "ашық әкімдік" қағидаларына қайшы келетін жағдай. Журналистердің құқығын бұзуға, олардың ресми жұмысына кедергі келтіріп, күш көрсетуге ешқашан жол берілмеуі керек. Олар өздерін қай жерде де еркін сезінуі тиіс. БАҚ өкілдері еліміздің тиісті заңнамалары мен нормативті-құқықтық актілеріне сәйкес қажетті толыққанды ақпарат алуға қай кезде де құқылы. Бұл жағдайға қатысты, Алматы қаласы әкімдігінің басшылығы қызметтік тексеру жүргізіп, тиісті шаралар қабылдауы қажет деп санаймын. Кінәлі тұлғалар жауапқа тартылуы тиіс. Алдағы уақытта қай жерде болмасын, БАҚ өкілдеріне қатысты бұндай келеңсіз жағдайларға жол берілмеуі қажет", - дейді Балаева.