Prezident Qasym-Jomart Toqaev Almatyda ótip jatqan «Qazaqstan – Qytai» investitsiialyq forýmynda eki el arasyndaǵy saýda-ekonomikalyq bailanystardy odan ári damytý baǵyttaryna toqtaldy, dep habarlaidy ult.kz.
Forým bastalar aldynda jiynǵa qatysýshylar Mańǵystaý oblysyndaǵy qaiǵyly oqiǵa saldarynan qaza tapqan áskeri qyzmetshilerdi bir minýt únsizdikpen eske aldy.
Memleket basshysy Qazaqstan men Qytai arasyndaǵy strategiialyq seriktestiktiń jańa kezeńge qadam basqanyn atap ótti.
«Búginde qazaq-qytai qarym-qatynasy sapalyq turǵydan jańa deńgeige kóterildi dep aitýǵa bolady. Biz máńgilik dos ári senimdi seriktes retinde yntymaqtastyǵymyzdyń jańa “altyn 30 jyldyq” kezeńine qadam basyp jatyrmyz», – dedi Prezident.
Qasym-Jomart Toqaevtyń aitýynsha, Qytai – Qazaqstannyń eń iri saýda seriktesi. Byltyr eki el arasyndaǵy taýar ainalymy shamamen 50 mlrd dollarǵa jetken. Úkimetter bul kórsetkishti 100 mlrd dollarǵa deiin jetkizý baǵytynda jumys istep jatyr.
Sonymen qatar Qytai Qazaqstan ekonomikasyna 29 mlrd dollardan astam investitsiia quiǵan. Qazir elimizde Qytaidyń qatysýymen 9 myńnan astam kásiporyn jumys isteidi.
Prezident ónerkásip, tsifrlandyrý, «aqyldy qalalar», spýtniktik tehnologiialar, aýyl sharýashylyǵy, densaýlyq saqtaý jáne bilim berý salalaryndaǵy yntymaqtastyqtyń da nyǵaiyp kele jatqanyn aitty.
Toqaev investitsiialyq ahýaldy jaqsartý úshin investorlardyń quqyqtaryn qorǵaýǵa erekshe mán beriletinin atap ótti. Osy maqsatta Bas prokýratýra janynan Investorlardyń quqyqtaryn qorǵaý komiteti qurylǵanyn, al Bas prokýrorǵa investitsiialyq ombýdsmen mindetteri júktelgenin jetkizdi.
Orta dálizdi damytýǵa basymdyq berilmek
Memleket basshysy Qazaqstan men Qytai arasyndaǵy seriktestiktiń negizgi baǵyttarynyń biri kólik-logistika salasy ekenin aitty.
Onyń sózinshe, Lianiýngannan Aqtaýǵa deiin Qytai jaǵalaýyn Kaspiimen bailanystyratyn logistikalyq toraptar jelisi qalyptasyp keledi. Al Chendý qalasyndaǵy qazaq-qytai terminaly osy baǵyttaǵy mańyzdy býynǵa ainalmaq.
«Aziia men Eýropa arasyndaǵy zamanaýi kólik bailanysyn túzetin Orta dálizdi órkendetýdi airyqsha mindet dep sanaimyz», – dedi Qasym-Jomart Toqaev.
Prezidenttiń aitýynsha, 2029 jylǵa qarai Qytaidan Eýropaǵa qatynaityn konteinerli poiyzdardyń sany 3 myńǵa deiin jetýi múmkin. Bul Qazaqstannyń jahandyq logistika júiesindegi rólin kúsheitedi.
Sondai-aq biyl tamyzda Aral – Kaspii avtomagistraliniń qurylysy bastalǵan. Jańa jol Shyǵys – Batys baǵytyndaǵy tasymal kólemin arttyrýǵa múmkindik beredi.
Taiaý ýaqytta Moiynty – Qyzyljar jáne Baqty – Aiagóz temirjoldarynyń qurylysy aiaqtalatyny aityldy.
Budan bólek, «Aqyldy shekara» pilottyq jobasy aiasynda tsifrlyq tehnologiialar engizilip jatyr. Qytailyq Minmetals Logistics korporatsiiasymen birlesip júrgizýshisiz kólik tehnologiialary men tsifrlyq sheshimder qoldanylatyn logistika dálizin qurý josparlanǵan.
Prezident azamattyq aviatsiia salasyndaǵy bailanystarǵa da toqtaldy. Biyl Almaty – Sian, Almaty – Shanhai, Astana – Gýanchjoý jáne Aqtaý – Úrimji baǵyttary boiynsha jańa áýe reisteri ashylǵan. Osy aptada Almaty men Chýntsin qalalaryn tikelei bailanystyratyn alǵashqy jolaýshylar reisi iske qosylǵan.
