Memleket basshysy Qasym-Jomart Toqaev Úkimet pen baqylaýshy organdarǵa sybailas jemqorlyqqa qatysty quqyqbuzýshylyqtardy barynsha azaitý jáne kvazimemlekettik sektordaǵy kompaniialardyń jumys sapasyn jaqsartý jóninde usynys engizýdi tapsyrdy. Tapsyrmany oryndaý merzimi – biylǵy 24 qarasha, dep habarlaidy ult.kz.
Prezident joǵary laýazym ieleriniń jaýapkershiligine toqtalyp, eshkimniń zańnan joǵary turmaitynyn atap ótti.
«Qoǵamymyzda atqaratyn laýazymyna, sińirgen eńbegine ne bolmasa tamyr-tanystaryna, sonyń ishinde týystyq bailanystaryna qaramastan, eshkim de zańnan attap kete almaidy. Bul – men úshin myzǵymaityn ustanym», – dedi Toqaev.
Memleket basshysy sońǵy ýaqytta keibir kelisimder men sharttardyń qaita qaralǵanyn aityp, kásipkerlerge kedergi jasaý biliktiń maqsaty emes ekenin jetkizdi. Sondai-aq 2027 jylǵy 1 qańtardan bastap shaǵyn kásipkerlikti tekserýge arnalǵan taǵy úsh jyldyq moratorii jariialaý tapsyrylǵanyn eske saldy.
Toqaev «Samuryq-Qazyna» qory men memlekettik kompaniialardyń jumysy, sonyń ishinde «Qazaqstan temir jolynyń» qyzmeti úzdiksiz jalǵasatynyn málimdedi. Onyń pikirinshe, jemqorlyqqa qarsy kúres investorlar men nesie berýshilerdiń senimin arttyryp, memlekettik institýttardyń ashyq ári tiimdi jumys isteýine yqpal etýi kerek.
Prezident Bas prokýratýranyń zańsyz iemdenilgen jalpy somasy 1,3 trillion teńgeden asatyn aktivterdi qaitarǵanyn da atap ótti. Bul qarajat 466 áleýmettik jáne infraqurylymdyq nysan salýǵa baǵyttalǵan. Qazirgi ýaqytta olardyń 383-i, sonyń ishinde meditsinalyq mekemeler, mektepter, sport keshenderi men sýmen jabdyqtaý jelileri paidalanýǵa berilgen.
Sonymen qatar Memleket basshysy salynǵan nysandardyń, ásirese joldardyń sapasyn tekserý qajettigin aitty.
«Osy oqiǵanyń ózi jemqorlyqqa qatysty quqyqbuzýshylyqtar memlekettik kompaniialardyń eń osal tusy, iaǵni basty derti ekenin aiqyn kórsetip otyr», – dedi Prezident.
Osyǵan bailanysty Úkimet pen baqylaýshy organdar 24 qarashaǵa deiin sybailas jemqorlyq quqyqbuzýshylyqtaryn azaitý jáne kvazimemlekettik sektordaǵy kompaniialar men olardyń qyzmetkerleriniń jumys sapasyn jaqsartý jóninde usynys ázirleýi kerek.
